Հոկտեմբերի 23-ին, ժամը 17:00-20:00-ին, Կոմիտասի անվան կոնսերվատորիայի դիմացի այգում կանցկացվի համերգ-հանրահավաք` հայտնի հասարակական եւ մշակույթային գործիչների մասնակցությամբ:
«Թեղուտի պաշտպանության խումբ» քաղաքացիական նախաձեռնության անդամները հոկտեմբերի 8-ին Երեւանի քաղաքապետարան են ներկայացրել իրազեկում ս.թ. հոկտեմբերի 23-ին, ժամը 17:00-20:00, Երեւան քաղաքի «Կասկադ» համալիրին հարակից տարածքում կամ Շառլ Ազնավուրի անվան հրապարակում հավաք եւ բացօթյա համերգ անցկացնելու վերաբերյալ, սակայն քաղաքապետարանը մերժել է` առաջարկելով նախատեսված միջոցառումն անցկացնել Վարդան Մամիկոնյանի արձանին հարակից տարածքում` իրազեկման մեջ նշված օրը եւ ժամին: Նշված տարածքը աննպատակահարմար համարելով` կազմակերպիչները եւս մեկ անգամ դիմել են քաղաքապետին` իրազեկելով համերգ-հանրահավաքը Կոմիտասի անվան կոնսերվատորիայի դիմացի այգում կամ Մաշտոցի պողոտայի եւ Սարյան փողոցի միջև գտնվող այգում անցկացնելու մասին: Ի պատասխան` Երեւանի քաղաքապետի լիազոր ներկայացուցիչը հայտնել է, «որ դեռեւս 13.10.2010թ. հ.5/Ս-2664 գրությամբ Ձեզ արդեն իսկ տեղեկացվել է, որ քաղաքապետարանը չի առարկում նախատեսված միջոցառումն անցկացնել Վարդան Մամիկոնյանի արձանի հարակից տարածքում` իրազեկման մեջ նշված օրը եւ ժամին»: Փաստորեն քաղաքապետարանը չի արգելել միջոցառումը Կոմիտասի անվան կոնսերվատորիայի դիմացի այգում անցկացնելու դիմումը: Այդուամենայնիվ, այսօր առավոտյան միջոցառման կազմակերպիչ Հրայր Սավզյանին է զանգահարել գնդապետ Զարզանդ Եղիազարյանը եւ տեղեկացրել, որ «միջոցառումը չի լինելու», քանի որ քաղաքապետարանը «մերժել է» դրա իրականացումը Կոմիտասի արձանին հարող տարածքում եւ առաջարկել է Վարդան Մամիկոնյանի արձանի հարակից տարածքը: Ավելին, Եղիազարյանը հեռախոսը փոխանցել է Երեւանի փոխոստիկանապետ Ռոբերտ Մելքոնյանին, որը սպառնացել է,` ասելով, թե իրենք միջոցառումը «թույլ չեն տալու, գալու են ու արգելելու են» եւ ավելացրել` «ոչ մի հարց, լսի, չես հասկանում, արգելված ա, չեք անելու, վերջ»:
