Ադրբեջանական 1news.az-ը, վկայակոչելով թուրքական լրատվամիջոցները, հայտնում է, որ Թուրքիայի էներգետիկայի ու բնական պաշարների նախարար Թաներ Յըլդըզը հայտարարել է, որ Իրանի նկատմամբ ԱՄՆ-ի ու ԵՄ-ի որոշումները Թուրքիայի համար պարտադիր չեն.
«Իրանի հանդեպ բեռնարգելք դնելու հարցում Թուրքիան պետք է հետևի միայն ՄԱԿ-ի որոշումներին, իսկ մյուս կազմակերպությունների կամ երկրների ընդունած նմանատիպ որոշումները մեզ համար չեն կարող ծառայել որպես հրաման։
Մենք հետևում ենք Իրանի հանդեպ ԱՄՆ-ի ու ԵՄ-ի ընդունած մի շարք որոշումներին։ Սակայն մեզ համար վռորոշ են ՄԱԿ-ի որոշումները։ Դրանցից բացի, մենք պարտավոր չենք ենթարկվել այլ որոշումների։ Ներկայումս ներկրումը շարունակվում է, և ճանապարհային քարտեզում չկան փոփոխություններ»։
Հիշեցնենք, որ ավելի վաղ Իրանի նկատմամբ ամերիկյան պատժամիջոցներին միանալու հարցում Թուրքիային համոզելու համար Անկարա են ժամանել ԱՄՆ Պետդեպարտամենտի մի շարք ներկայացուցիչներ, որոնց, սակայն, չհաջողվեց փոխել Թուրքիայի դիրքորոշումը տվյալ հարցում։ Նմանատիպ վերջին այցը 3 օր առաջ կատարել է ԱՄՆ պետքարտուղարի տեղակալ Ուիլյամ Բըրնսը։
