Իսրայելի խորհրդարանը վերանայում է օրենքի նախագիծ, որով արգելվելու է ցանկացած նպատակներով, բացի կրթականից, կիրառել Հոլոքսոտի խորհրդանիշները:
Ինչպես հայտնում է BBC-ն, նոր օրինագիծը արգելելու է օգտագործել «նացիզմ» բառը կամ նմանատիպ այլ բառեր, որոնք ասոցացվում են նացիստական Գերմանիայի հետ, ինչպես նաև Երրորդ ռեյխի խորհրդանիշները, նրա առաջնորդների նկարները և անունները, Հոլոքոստի և սվաստիկայի խորհրդանիշները:
Փաստաթուղթը կազմվել է Երուսաղեմում ուլտրաօրթոդոքսալ հրեաների ցույցից հետո` ուղղված աշխարհիկ ԶԼՄ-ների գործողությունների դեմ:
Որոշ քաղաքական գործիչներ և հասարակական կազմակերպություններ, այդ թվում՝ նաև երկրի նախագահ Շիմոն Պերեսը, «Կադիմ» կուսակցության առաջնորդ Ցիպի Լիվնին, նաև համակենտրոնացման ճամբարի մի քանի նախկին բանտարկյալներ, դատապարտել էին այդ ցույցը:
Հիշեցնենք, որ արդեն մի քանի ամիս է, ինչ Իսրայելի ուլտրաօրթոդոքսալ հասարակությունը վեճերի մեջ է գտնվում երկրի աշխարհիկ հասարակության հետ: Հակամարտության պատճառը ուլտրաօրթոդոքսալ հրեաների՝ աշխարհիկ բնակչության վրա իրենց արժեքները տարածելու փորձեր են:
