Արդեն մի քանի տարի է, ինչ շատ հայաստանցիներ փոխել են Ամանորն իրենց բնակարաններում տոնելու ավանդույթը: Ամանորյա օրերին Երևանը գրեթե դատարկ է, քաղաքացիները հանգստանում են արտերկրում:
«Առաջին լրատվական»-ը հարցումներ անցկացրեց մի քանի տուրիստական գործակալությունների շրջանում: Հայերի նախընտրությունների ցուցակը գլխավորում է Դուբայը, երկրորդ տեղում Եգիպտոսն է, երրորդում` Հորդանանը, հանգստանալ նախընտրում են նաև Շրի Լանկայում և եվրոպական երկրներում`Իտալիայում, Ֆրանսիայում:
«Տուր» տուրիստական գործակալությունից մեզ տեղեկացրին, որ իրենց գործակալությունը կազմակերպել է հանգիստ Եգիպտոսում` Շարմ էլ Շեյխում, Դուբայում և Հորդանանում: Այն դիտարկմանը, թե ինչո՞ւ են նախընտրում հանգստանալ այս երկրներում, պատասխանեցին, որ սրանք հայերի նախընտրած արդեն ավանդական դարձած տարբերակներն են: «Այնպիսի ուղղություններ են, որտեղ ջերմաստիճանը բարձր է, ծովափ կա և գները նույնպես առավել հարմար են»,- ասացին «Տուր» տուրիստական գործակալությունից:
«Արմանե» տուրիստական գործակալության հաճախորդները նույնպես նախընտրել են հանգստանալ Դուբայում և Եգիպտոսում: Ըստ տուրիստական գործակալության ներկայացուցչի`ավելի մատչելի է հանգստանալ այդ երկրներում, քան Հայաստանի գեղատեսիլ վայրերում:
Դուբայում հնգօրյա տուրն արժե 273,000 դրամ, իսկ
Եգիպտոսում, մասնավորապես` Հուրգադայում 110,000 դրամից է սկսվում, Շարմ էլ Շեյխում հանգստանալն արժե 196,000 դրամ: Դեպի Իտալիա 1 շաբաթյա էքսկուրսիոն տուրն արժե 325,000 դրամ, իսկ Հորդանանում մի քանի գիշեր կարելի է հանգստանալ տրամադրելով 544,000 դրամ:
Եթե փորձենք համեմատել Հայաստանյան գները, կտեսնենք, որ արտերկրում հանգստանալու գնային առավելությունը մեծ չէ: Օրինակ՝ Ջերմուկ քաղաքի հյուրանոցում ամանորյա հանգստի փաթեթը մեկ անձի համար արժե 180,000 դրամ: Հանգիստը ներառում է 7 օր: Տուրիստական գործակալներից մեկը մեզ հետ զրույցում նշեց, որ սա ամենաէժան տարբերակներից մեկն է, քանի որ կան հնգօրյա փաթեթներ 500,000 դրամից ավելի արժողությամբ:
