Գյումրիի ԳԱԼԱ հեռուստաընկերությանը Հեռուստատեսության և ռադիոյի ազգային հանձնաժողովը թույլ չտվեց Շիրակի մարզում թվային ցանցի միջոցով հեռարձակում իրականացնելու լիցենզիա ստանալ: ՀՌԱՀ-ը 14 միավոր գնահատեց Գյումրիի ԳԱԼԱ հեռուստաընկերության հայտը, և հաճախության համար պայքարում հաղթեց Գյումրիի «Ցայգ» հեռուստաընկերությունը, որի հայտը գնահատվել է 42 միավոր: Այս կապակցությամբ «Առաջին լրատվականը» զրուցեց ԳԱԼԱ հեռուստաընկերության ղեկավար Վահան Խաչատրյանի հետ:
– Ինչպե՞ս կմեկնաբանեք ՀՌԱՀ-ի կայացրած որոշումը:
– Այդ որոշումը շատ անլուրջ է: Ընդհանրապես, ինչ կապված է Գրիգոր Ամալյանի հետ, շատ անլուրջ է, և ես չեմ պատրաստվում մեկնաբանել նրա որոշումը:
– Սպասելի՞ էր Ձեզ համար այդ որոշումը:
– Այո, դեռևս 2 ամիս առաջ հարցազրույցում ասել էի, որ մրցույթում չենք հաղթելու. գիտեինք, սպասում էինք դրան:
– Ինչո՞ւ, Ձեր կարծիքով, ի՞նչն էր պատճառը:
– ՀՌԱՀ-ի գործելաոճը, այս ութ տարիների փորձը թույլ է տալիս լուրջ կասկածներ ունենալու, որ ՀՌԱՀ-ը շարունակելու է նույն ոճով:
– Այսքանից հետո ի՞նչ եք պարտաստվում անել:
– Ես չեմ տարբերակում ժամանակը` մինչև մրցույթին մասնակցելը և դրանից հետո։ Ինձ համար դա անհասկանալի է: Այս մրցույթին, ծրագրված շոուին անլուրջ եմ վերաբերվում:
– Իսկ ԳԱԼԱ-ն մնալո՞ւ է եթերում, թե՞ կզրկվի եթերից:
– Մինչև 2015 թ. անալոգային եթեր ենք ունենալու Շիրակի մարզի տարածքում, ինչպես այսօր է: Իսկ դրանից հետո` դեռ չեմ որոշել: Մենք շարունակելու ենք նույն գործելաոճով աշխատել, և որևէ բան չի փոփոխվի մեր աշխատանքում: