Ազգային վիճակագրական ծառայության տվյալների համաձայն` արտաքին առևտրաշրջանառության ծավալը 2011 թ. հունվար-նոյեմբերին, ընթացիկ գներով, կազմել է 1 տրլն 843.8 մլրդ դրամ կամ 4 մլրդ 957.8 մլն ԱՄՆ դոլար, այդ թվում ապրանքների արտահանումը` 448.8 մլրդ դրամ կամ 1 մլրդ 206.7 մլն դոլար և ներմուծումը` 1 տրլն 395.0 մլրդ դրամ կամ 3 մլրդ 751.1 մլն դոլար:
Անցյալ տարվա Հայաստանի առևտրային գործընկերների թոփ-տասնյակում առաջին հորիզոնականում Ռուսաստանն է՝ ընդհանուր ծավալի 20.0%, Չինաստանը՝ 7.7%, Գերմանիան՝ 7.5%, Իրանը՝ 5.9%, Միացյալ Նահանգները՝ 4.6%, Բուլղարիան՝ 4.6%, Ուկրաինան՝ 4.5%, Թուրքիան՝ 4.4%, Իտալիան՝ 3.2%, Նիդեռլանդները՝ 2.8%: Մեր անմիջական հարևան Վրաստանի հետ ՀՀ առևտրաշրջանառությունը կազմում է ընդհանուրի 2.2%-ը:
2011 թ. հունվար-նոյեմբերին ՀՀ առևտրաշրջանառության ծավալներն ամենաշատ ավելացել են Իսպանիայի հետ՝ 3 անգամ՝ հասնելով 110 մլն 624 հազար դոլարի (ընդհանուր ծավալի 2.2%):
Նշենք, որ Թուրքիայի հետ ՀՀ առևտրաշրջանառությունը նշված ժամանակահատվածում աճել է 17.3%-ով՝ կազմելով 219 մլն 227.7 հազար դոլար: