Չի բացառվում, որ Հայաստանի և Ադրբեջանի նախագահների՝ հունվարի վերջին Սոչիում կայանալիք հանդիպման ընթացքում ՌԴ նախագահ Դմիտրի Մեդվեդևը ղարաբաղյան հակամարտության կարգավորման հարցի քննարկմանը զուգահեռ, փորձի տարածաշրջանային երկու երկրներին Իրանի հարցում իր դաշնակիցը դարձնել: Իրանագետ Մհեր Բաղդասարյանն այս մասին ասաց «Առաջին լրատվական»-ի հետ զրույցում:
Նրա խոսքով, ինքը, միաժամանակ, առավել հակված է մտածելու, որ եռակողմ հանդիպման ընթացքում Իրանի հարցը կարող է քննարկվել երկրորդական-երրորդական պլանում: «Եթե հաշվի առնենք, որ նախագահների վերջին՝ Կազանյան հանդիպումը չհաջողվեց, ինչը Մեդվեդևի հեղինակությանը բավական վնաս հասցրեց, ապա կարծում եմ, որ նախատեսված հանդիպման ժամանակ Մեդվեդևը՝ որպես միջնորդ կողմ, կփորձի բարձրացնել իր վարկանիշը: Բացի այդ, հաշվի առնելով Հայաստան-Իրան, Ադրբեջան-Իրան և Ռուսաստան-Իրան հարաբերությունները, պետք է նշել, որ դրանք մի փոքր բազմաբնույթ են, այդ հարաբերություններում կան տարրեր, որոնք միմյանցից արմատապես տարբերվում են: Հայաստանն ու Իրանը դաշնակից երկրներ են, այն դեպքում, երբ Իրանն Ադրբեջանի համար մրցակից է, նրանց հարաբերություններն այնքան էլ լավ չեն, Ադրբեջանում անընդհատ հակաիրանական ակցիաներ են տեղի ունենում և այլն»,- ասաց իրանագետը:
Հիշեցնենք, որ Հայաստանի, Ռուսաստանի և Ադրբեջանի ղեկավարների հանդիպումը Սոչիում նախատեսված է այս ամսվա վերջին:
