Թուրքական Hürriyet թերթի փոխանցմամբ՝ 2007 թվականի հունվարի 19-ին Ստամբուլի Շիշլի թաղամասում իրականացված հայկական «Ակօս» թերթի խմբագրապետ Հրանտ Դինքի սպանության գործում ի հայտ են եկել նոր աղմկահարույց բացահայտումներ, որոնք, թուրքական թերթի տվյալներով, կարող են տակնուվրա անել ամեն ինչ։
Այսօր Ստամբուլի 14-րդ ծանր հանցագործությունների դատարանում մեկնարկել է Դինքի սպանության գործով 24-րդ դատալսումը, որին ներկա գտնվելու համար բանտից դատարան են բերվել կասկածյալներ Յասին Հայալը և Էրհան Թունջելը։
Թուրքիայի հեռահաղորդակցության վարչությունը (TİB) դատարանին ներկայացրել է Դինքի սպանության գործով անցնող 5 կասկածյալների հեռախոսազանգերի ձայնագրությունները։ Դրանք վկայում են, որ Դինքի սպանության օրը տեղանքում գտնվող կասկածյալները հեռախոսազրույցներ են ունեցել միմյանց հետ։
Հիշեցնենք, որ 5 ամիս շարունակ TIB-ը հրաժարվում էր դատարանին ներկայացնել այդ հեռախոսազանգերի ցանկը՝ դա «պատճառաբանելով նրանով, որ հեռախոսազրույցների ձայնագրությունների տրամադրումը մարդկանց «անձնական կյանքի գաղտնիքների խախտում է»։
Միայն նախորդ տարվա դեկտեմբերի սկզբին TIB-ը համաձայնեց դատարանին ներկայացնել 3 օպերատորներին (Turkcell, Vodafone, Avea) պատկանող 12 բազային կայաններից ժամը 11.00-15.00-ն ընկած ժամանակահատվածում արված հեռախոսազանգերը։
