Այս տարի, անցած տարվա տոնական օրերի համեմատ, գրանցվել է շտապօգնության կանչերի թվի աճ: Այսօր կայացած մամուլի ասուլիսին այս մասին հայտարարեց առողջապահության նախարարության աշխատակազմի ղեկավար Սուրեն Քրմոյանը:
Նրա տեղեկացմամբ` Նոր տարվա օրերին առողջապահության նախարարության թեժ գիծն աշխատել է շուրջօրյա գրաֆիկով և ստացել 28 զանգ: «Ինչ վերաբերում է տոնական օրերին Երևանում գրանցված շտապօգնության կանչերի թվաքանակին, ապա ամեն օր միջինացված կարգով սպասարկվել է 715 կանչ: Հունվարի 1-9-ը մայրաքաղաքում ծնվել է 447 երեխա»,- նկատեց Քրմոյանը:
Ինչպես ասաց առողջապահության նախարարության աշխատակազմի ղեկավարը` շտապօգնության հանդեպ ազգաբնակչության վստահության աստիճանը բարձրացել է: «Միակ խնդիրը, որ շարունակում է չլուծված մնալ, մարզային շտապօգնության ծառայության հարցն է: Մարզերի բնակիչները, ցավոք, ֆիքսված հեռախոսակապից 1-03 զանգահարելով` դեռևս չեն կարող կապ հաստատել իրենց բնակավայրի շտապօգնության ծառայության հետ, և մենք հայաստանյան բջջային օպերատորների հետ բանակցություններ ենք վարում, որպեսզի մարզերի բնակիչներն այսուհետ զանգահարեն և միանգամից կապ հաստատեն ոչ թե Երևանի, այլ իրենց բնակավայրերի շտապօգնության հետ»,- ասաց Սուրեն Քրմոյանը:
