«Հայացք» մամուլի ակումբում այսօր հյուրընկալվել էր ԱԺ պատգամավոր, ՀՀԿ անդամ Հովհաննես Սահակյանը, որը խոսեց առաջիկա ներքաղաքական զարգացումների, 100 տոկոսանոց համամասնական ընտրակարգի անցման նպատակահարմարության մասին:
Տարին նախընտրական է, բոլոր ուժերը մարտական են տրամադրված, նշեց նա:
Անդրադառնալով 100 տոկոսանոց համամասնական ընտրակարգի անցման նպատակահարմարությանը` նա երկու` իրավական և քաղաքական պատճառ նշեց: Պատգամավորի կարծիքով` նպատակահարմար չէ օրենսգրքում փոփոխություններ մտցնել: Խոսելով քաղաքական պատճառների մասին` նա նկատեց. մեղադրանքին, թե իբր մեծամասնականով անցնում են այնպիսի մարդիկ, ովքեր չպետք է անցնեին, կարելի է հակադարձել` նույն այդ մարդիկ կարող են ընդգրկվել նաև համամասնական ցուցակներում և անցնել խորհրդարան:
«Խնդիրը լրիվ համամասնական կամ կիսահամամասնականը չէ, այլ խորհրդարանի ներկայացուցչական կազմն է: Քաղաքական դաշտում քաղաքական զարգացվածության աստիճանը այնքան բարձր չէ, որպեսզի մարզերի բնակիչները կուսակցություններին ըստ գաղափարական հենքի ընտրեն. այ, սա է խնդիրը»,- նկատեց նա:
ՀՀԿ-ական պատգամավորը նշեց, որ առայժմ կոալիցիոն ուժերը հակված չեն ընտրություններին մասնակցել առանձին ցուցակներով, սակայն նաև դա չբացառեց` հավելելով, որ քաղաքականության մեջ ամեն ինչ հնարավոր է:
Կա քաղաքական որոշում, նկատեց Հովհաննես Սահակյանը, և հավելեց. «Մենք, որպես իշխող կուսակցություն, խնդիր չենք տեսնում հարյուր տոկոսանոց համամասնական ընտրակարգի հետ կապված, բայց այժմ նպատակահարմար չենք համարում անցնել այդ ընտրակարգին»:
Արդեն իսկ նախընտրական տարի է, բնական է, որ պետք է քննարկվեն նախընտրական ցուցակները. «ՀՀԿ նախագահ Սերժ Սարգսյանը ապացուցեց, որ կարևորվում են կատարված աշխատանքները, բնական է, որ այս ընտրությունների ժամանակ ցուցակում փոփոխություններ կլինեն. իհարկե, այն մարդիկ ովքեր ունեն որոշակի դերակատարություն` կգնահատվեն և կունենան իրենց դերը, բայց պարտադիր չէ, որ նրանք տեղ ունենան ԱԺ-ում: Մենք փոփոխություններին վերաբերում ենք դրականորեն»:
Նախընտրական ցուցակը չկա, բայց սկզբունքները քննարկվում են, իսկ ցուցակը կհրապարակվի սահմանված ժամկետներում, նկատեց ՀՀԿ-ական պատգամավորը:
