Դեկտեմբերի 24-ին աշխարհի քրիստոնյա երկրների մեծ մասը նշում է Քրիստոսի ծննդյան ճրագալույցը:
Քրիստոսի ծնունդը Գրիգորյան օրացույցով դեկտեմբերի 25-ին նշում են ոչ միայն կաթոլիկներն ու բողոքականները, այլև քրիստոնեական համարյա բոլոր ուղղությունները, որ ներառում են Հունաստանի, Ռումինիայի, Բուլղարիայի, Լեհաստանի, Սիրիայի, Լիբանանի և Եգիպտոսի ուղղափառներին:
Կաթոլիկների գլխավոր պատարագը տեղի կունենա Վատիկանում: Դեկտեմբերի 25-ի կեսգիշերին Հռոմի պապ Բենեդիկտոս XVI-ը կանցկացնի Ծննդյան պատարագ Վատիկանի Սբ Պետրոս եկեղեցում, իսկ հաջորդ օրը կդիմի աշխարհին:
Քրիստոնյաների համար Քրիստոսի ծնունդը ազդարարում է նրա երկրային կյանքի սկիզբը. Նա լույս աշխարհ է եկել, որպեսզի փրկի մարդկությանը: Այդ օրը խորհրդանշում է հույս և մեղքերից ազատվելու հնարավորություն:
Հիսուս Քրիստոսը ծնվել է Բեթղեհեմում` Երուսաղեմից ոչ հեռու: Քրիստոսի ծննդյան հետ կապված արարողությունները սկսվում են երեկոյան առաջին աստղի երևալուն պես, որն ամբողջ աշխարհին ազդարարում է Աստծո Որդու ծնվելը: