Ընդդիմադիրները հայտնել են, որ Արաբական երկրների լիգայի դիտորդները միայն ավել ժամանակ են տալիս Սիրիայի իշխանություններին՝ իրենց հակառակորդներին ճնշելու համար։
Նման հայտարարությամբ ընդդիմադիրները հանդես են եկել այն բանից հետո, երբ Լիգան որոշել է դիտորդներին առայժմ թողնել Սիրիայում՝ չնայած, որ վերջիններս չեն կարողանում իրականացնել իրենց առաքելությունը։
Reuters-ը գրում է, որ դիտորդները, ովքեր իրենց աշխատանքները Սիրիայում սկսել են երկու շաբաթ առաջ, մինչ այժմ չեն կարողացել դադարեցնել նախագահ Բաշար Ալ-Ասադի դեմ ուղղված ցույցերի բռնի ճնշումները: Հիշեցնենք, որ ՄԱԿ-ի հաղորդմամբ՝ բախումների ընթացքում առավել քան 5000 մարդ է մահացել:
Երեկ Կահիրեում տեղի ունեցած հանդիպման ընթացքում Լիգան հայտնել է, որ կառավարությունը միայն մասնավորապես է նպաստել արյունահեղության դադարեցմանը և քաղաքներից զորքերի հեռացմանը:
ԱԵԼ–ը նաև հայտնել է, որ Սիրիայում դիտորդների թիվը կավելացվի, և այնտեղ 165-ի փոխարեն կաշխատեն 200 դիտորդներ:
