Հունվարի 7-ին «Հեծանիվ+» էկո-մարզական ՀԿ-ն մի շարք բնապահպան ակտիվիստների հետ արշավ է կազմակերպել դեպի Ազատի կիրճ: Արշավորդների հետ են եղել բնապահպանական քաղաքացիական նախաձեռնությունների ներկայացուցիչները, այդ թվում՝ բնապահպան ակտիվիստ Մարիամ Սուխուդյանը, ով «Առաջին լրատվական»-ին ահազանգեց, որ Ազատի կիրճում իրականացվել են ծառահատումներ:
Նշենք, որ Ազատի կիրճը հայտնի է յուրահատուկ բուսատեսակներով, հազվագյուտ ծառերով: Բնապահպաններն այն անվանում են «Երևանին մոտ մի փոքրիկ դրախտ»: Ըստ նրա` Ազատի կիրճի տարածքում իրականացվել են ծառահատումներ, այնուհետև այդ տարածքները մեծ քարերով փակել են, որպեսզի դրանք տեսանելի չլինեն: «Կտրվել էին տասնյակ հաստաբուն, առողջ ծառեր: Դրանք սանիտարական էտումներ չէին, հատվել էին առողջ ծառերը: Ճանապարհը շարունակելիս նաև կրակոցներ ենք լսել, հայտնաբերել ենք կենդանիների համար տեղադրված «կապկաններ», որոնք նախատեսված են նրանց խեղդելու համար: Ես գտել և ինձ հետ տուն եմ բերել Կալաշնիկով տեսակի զենքի փամփուշտ»,- մանրամասնեց Մարիամ Սուխուդյանը`տեսածը խայտառակություն որակելով:
Նա ընդգծեց, որ այս անօրինությունները կանխելու համար ահազանգել է Բնապահպանության նախարարության ներկայացուցչին, սակայն դեռևս գործնական քայլեր չի նկատել: Բնապահպան-ակտիվիստ Մարիամ Սուխուդյանն ասաց, որ մի տարի առաջ նույնպես նույն խնդրով ահազանգել են նախարարությանը, սակայն կրկին արձագանք չի եղել: Մարիամ Սուխուդյանի համոզմամբ, նախարարությունը պարզապես արհամարհում է ակտիվիստների ահանազանգերը և այս անգամ նույնպես որևէ պատասխան չկա: Նրա եզրակացությամբ նախարարությունը համագործակցում է նման ոճրագործների հետ, եթե չի կանխում սպանդը և անտառահատումը:
«Առաջին լրատվական»-ը Բնապահպանության նախարարությունից փորձեց պարզել` ի՞նչ է արվում այս ուղղությամբ: Բնապահպանության նախարարության հասարակայնության հետ կապերի բաժնի պետ Արծրուն Պեպանյանն ասաց, որ ստացել է Մարիամ Սուխուդյանի ահազանգը և առավոտյան դիմել է համապատասխան կառույցներին տեղեկատվությունը ճշտելու համար: «Եթե ծառահատումների տեղեկությունը ճշտվի, համապատասխան միջոցառումներ ձեռք կառնվեն»,- նշեց Արծրուն Պեպանյանը:
