Թուրքական Radikal թերթի փոխանցմամբ՝ «Էրգենեկոն» ահաբեկչական կազմակերպության գործի շրջանակներում Ստամբուլի դատախազությանն են ներկայացվել վարչապետ Էրդողանի բոլոր հեռախոսազրույցների, այդ թվում նաև «կարմիր գծով» արված հեռախոսազանգերի գաղտնազերծված ձայնագրությունները։
Դրանք հայտնաբերվել են Aydınlık թերթի խմբագրությունում կատարված խուզարկության ժամանակ։ Դրանց իսկությունը պարզելու համար ստամբուլյան դատախազությունը նամակ է ուղարկել Նախարարների կաբինետ՝ պահանջելով տեղեկատվություն տրամադրել այն հեռախոսահամարների համար, որոնցից օգտվել են Էրդողանը, նրա տեղակալ Ալի Բաբաջանը և Ջունեյթ Զափսուն։
Սակայն դատախազությունը պատասխան է ստացել, ըստ որի՝ դա անհնար է, քանի որ այդ հեռախոսազրույցներից (2003-2005) բավական շատ ժամանակ է անցել, և հնարավոր չէ պարզել, թե որ համարներից է օգտվել վարչապետը։