ԵԱՀԿ գործող նախագահի դաշտային օգնականները զննել են Ադրբեջանի Թերթերի շրջանի Բորսունլու գյուղի մերձակա այն տեղանքը, որտեղ դեկտեմբերի 17-ին պայթուն էր տեղի ունեցել: 1news.az-ի փոխանցմամբ` ԵԱՀԿ-ի գործող նախագահի անձնական ներկայացուցիչ Անթալ Հենդրիչը ասել է, որ իրենց ուսումնասիրության արդյունքները պաշտոնապես լրատվամիջոցներով կհրապարակեն ավելի ուշ:
Тrend գործակալության փոխանցմամբ` Ադրբեջանի պաշտպանության նախարարությունը դիմել է ԵԱՀԿ գործող նախագահի ներկայացուցիչ Անջեյ Կասպշիկին` կոչ անելով ջանքեր գործադրել՝ ուսումնասիրելու շփան գծում հրադադարի խախտումները:
Հիշեցնենք, որ երկուշաբթի օրը Ադրբեջանի պաշտպանության նախարարության խոսնակ Էլդար Սաբիրօղլուն հայտարարել էր, որ դեկտեմբերի 17-ին Թալիշ գյուղի ուղղությամբ տեղակայված ղարաբաղյան ստորաբաժանումների կողմից արձակված ականը ընկել է Ադրբեջանի վերահսկողության տակ գտնվող Բորսունլու բնակավայրի մոտակայքում: Սաբիրօղլուն հայկական կողմին մեղադրել էր հրադադարի մասին ձեռք բերված պարտավորությունները չհարգելու մեջ:
Սակայն ԼՂ պաշտպանության բանակի լրատվության և քարոզչության բաժինը հերքել էր ադրբեջանական կողմի տարածած այս տեղեկատվությունը: ԼՂ պաշտպանության բանակի լրատվության և քարոզչության պետ Սենոր Հասրաթյանը դա որակել էր որպես «ադրբեջանական պրոպագանդայի հերթական սադրանք»: «Ինչ վերաբերում է Թերթերի շրջանի Բորսունլու գյուղի մերձակայքում արձանագրված պայթյուններին, ապա, ըստ մեր հետախուզության տվյալների, դրանք ոչ թե հրետակոծության, այլ ադրբեջանական բանակի՝ մերձսահմանային գոտում տեղակայված զինապահեստներից մեկում տեղի ունեցած արտակարգ միջադեպի արդյունք էին», – ասել է Հասրաթյանը: