Գերմանական և միջազգային կազմակերպությունների լրագրողները քննդատությամբ են հանդես եկել Գերմանիաի դաշնային նախագահ Քրիստիան Վուլֆի դեմ, որը փորձում է ճնշում գործադրել լրագրողների վրա և կանխել իր համար անցանկալի հոդվածների հրապարակումը: Այս մասին հաղորդում է Deutsche Welle-ն:
Bild թերթը հաստատել է, որ Վուլֆը փորձել է արգելել իրենց տրամադրության տակ հայտնված այն նյութի հրապարակումը, ըստ որի՝ նախագահը 500 հազար եվրո վարկ է ստացել իր ծանոթ գործարարներից մեկի կնոջից: Դեկտեմբերի կեսերին նա զանգահարել է թերթի գլխավոր խմբագիր Կայ Դիքմանին և սպառնալիքներով նրանից պահանջել չհրապարակել այդ հոդվածը:
Պարզվել է, որ սա նմանատիպ միակ դեպքը չէ: Die Welt 3 թերթը հոււնվարի 3-ին հայտնել է, որ անցյալ տարվա ամռանը նախագահ Վուլֆը փորձել է թույլ չտալ իր և իր խորթ քրոջ հարաբերությունների մասին հոդվածի հրապարակումը: Հոդվածի հեղինակներից մեկին կանչել են նախագահական նստավայր, և Վուլֆը բացահայտ հայտարարել է, որ եթե հոդվածը լույս տեսնի, թերթը խնդիրներ կունենա: Չնայած դրան՝ հոդվածը հրապարկվել է:
Լրագրողական կազմակերպությունների կարծիքով՝ այդ սպառնալիքներով Վուլֆը խախտել է մամուլի ազատությունը և պարտավոր է անմիջապես բացատրություն տալ իր գործողություններին:
«ԶԼՄ-ների ազատությանը վտանգ է սպառնում, եթե բարձր պաշտոնի ներկայացուցիչը փորձում է ճնշում գործադրել գլխավոր խմբագրի կամ հրատարակչության ղեկավարի վրա՝ իր նկատմամբ քննադատական հոդվածների հրապարակումը կանխելու համար»,- հայտարարել է Մամուլի միջազգային ինստիտուտի տեղի մասնաճյուղի ղեկավարը:
Երկրի ընդդիմությունը իր հերթին պահանջում է նախագահի հրաժարականը: «Քրիստիան Վուլֆը զգալի վնաս է հասցրել դաշնային նախագահի պաշտոնի հեղինակությանը և դրանով իսկ՝ ԳԴՀ-ին»,- կարծում է ընդդիմությունը:
