Այն ավանդական շնորհավորանքը, որ սովորաբար հնչում է Նոր տարում` սեր, առողջություն, երջանկություն, հաջողությունն է, իսկ ամենակարևորն այն է, որ կարողանանք վերջիվերջո պարզ աչքերով մեկս մյուսին նայել:
Շնորհավորելով Ամանորն ու Սուրբ Ծնունդը` «Առաջին լրատվական»-ի հետ զրույցում նման բարեմաղթանք հնչեցրեց դերասան Հրանտ Թոխատյանը:
Նրա խոսքով հենց այդ դեպքում մեզ մոտ ամեն ինչ կստացվի` սկսած ամենավերևից` վերջացրած ամենաներքևինով:
«Այդ ժամանակ հարգանք կլինի մեկս մյուսի հանդեպ, գնահատանք` մեկս մյուսի հանդեպ և ամեն մեկն իր տեղում լինի ու քիթը չխոթի մյուսի գործի մեջ: Այդ դեպքում մեր երկիրը տասը քայլ առաջ կգնա ու կշարժվի դեպի լուսավոր օրեր»,- նշեց նա` ընդգծելով, որ միայն այդ դեպքում կկարողանանք այս գորշ մթնոլորտից դուրս գալ:
«Եթե դա անենք,ապրենք մենք, եթե ոչ` ուրեմն… Որովհետև մենք իրար նույն բանն ենք ցանկանում ամեն տարի»,- ասաց նա՝ համոզմունք հայտնելով, որ գալիք տարին պետք է լինի լուսավոր տարի։
