Այս տարի մարդու իրավունքների ոլորտը մնացել է այն խնդիրների շրջանակում, որը Հայաստանում արձանագրվեց 2008 թ. Մարտի 1-ից հետո: «Առաջին լրատվական»-ի հետ զրույցում նման տեսակետ հայտնեց ՀՔԱ Վանաձորի գրասենյակի նախագահ Արթուր Սաքունցը` ամփոփելով տարին մարդու իրավունքների ոլորտում:
Ըստ նրա` փաստ է, որ այս տարի քաղբանտարկյալները ազատվեցին` բացառությամբ, իհարկե, ՀԱԿ ակտիվիստ Տիգրան Առաքելյանի: Սա իրավապաշտպանը դրական փոփոխություն համարեց, սակայն ցավով նշեց, որ առաջընթաց չկա Մարտիմեկյան դեպքերի բացահայտման առումով:
«Մարդու իրավունքների պաշտպանի արտահերթ զեկույցն իմ կարծիքով` օրակարգում է: Արձանագրված բազմաթիվ խախտումները մինչ այժմ պատշաճ քննության չեն առնվել: Դա վերաբերում է ոստիկանության կողմից խաղաղ ցուցարարների նկատմամբ ուժի, բռնության կիրառման դեպքերին, որոնց վերաբերյալ հետաքննություն չի իրականացվել»,- մեկնաբանեց Ա. Սաքունցը` հավելելով, որ այս առումով առաջընթաց չի տեսնում: Իրավապաշտպանը կարծում է, որ այս տարի իրավախախտումներն ակնառու չէին, քանի որ ընտրական շրջան չէր: Նա նաև ասաց` մտահոգիչ են մնում իրավախախտումները զինված ուժերում:
