«Առաջին լրատվական»-ի հետ զրույցում Գյումրիի խնդիրներին անդրադարձավ «Շիրակ» կենտրոնի նախագահ Վահան Թումասյանը: Նա նշեց, որ քաղաքի առաջին սպառնալիքներից մեկը շարունակում է մնալ արտագաղթը: Վահան Թումասյանն անդրադարձավ «Հայրենակից» ծրագրի միջոցով հայրենիքը լքած քաղաքացիներին: Նրա համոզմամբ` նրանք լքեցին Գյումրին անվերադարձ:
«Այս տարի անօթևանների համար պետք է շահագործվեր 1756 բնակարան, բայց դա չիրականացավ: Այդ ընտանիքներն օրերն են հաշվում` երբ է ձմեռն ավարտվելու, որպեսզի նորից բնության միջոցով` արևով տաքանան, որովհետև զրկված են ջեռուցման հնարավորությունից»,- մեկնաբանեց Վ. Թումասյանը:
Նա անդրադարձավ նաև ձեռքբերումներին: Ձեռքբերումներ կան, ըստ նրա, հոգեբանական առումով. այնուամենայնիվ, այդ ընտանիքները դարձան շահառու և ապագայում կստանան բնակարան:
Այսօր Գյումրիի ամենակարևոր խնդիրը բարոյահոգեբանական վիճակն է: «Հուսալքված, հուսախաբված քաղաք է Գյումրին: Քաղաք, որը բաժանված է երկու մասի` տնակային ավանում տառապող ժողովուրդ և Գյումրիի մնացած մասը` բնակարաններում: Հասարակությանը պետք է վերադարձնել համայնք և նորմալ կյանքի»,- ասաց «Շիրակ» կենտրոնի նախագահը`առանձնացնելով երեք խնդիր` բարոյահոգեբանական, աշխատատեղերի և անօթևանների:
Վահան Թումասյանը հույս հայտնեց, որ գալիք տարին բարեհաջող կլինի Գյումրիի համար:
