Ռազմավարական հարձակողական սպառազինությունների (ՌՀՍ) պայմանագիրը երեկ ի վերջո վավերացվեց ԱՄՆ Սենատի կողմից: Այդ օրինագծին կողմ քվեարկեց 71 սենատոր, սա ավելին է, քան անհրաժեշտ էր պայմանագիրը վավերացնելու համար:
Վավերացման այս երկարատև գործընթացը հաջողությամբ պսակվեց նաև այն պատճառով, որ նախագահ Օբամային հաջողվեց համոզել որոշ հանրապետականների, որոնք դեմ էին արտահայտվում օրինագծին (դեմոկրատները Սենատում ունեն 8 ձայն, իսկ վավերացման համար անհրաժեշտ էր 67-ը): Բացի այդ, պայմանագրի վավերացման գործընթացի քարոզչությանն էին միացել բոլոր նախկին նախագահներն ու պետքարտուղարները, որոնք հաստատում էին, որ սա աննախադեպ է և բխում է ԱՄՆ շահերից:
Երեկ ԱՄՆ նախագահ Բարաք Օբաման հայտարարեց, որ ՌՀՍ պայմանագիրը վերջին 20 տարիների ամենակարևոր ռազմական փաստաթուղթն է: Նրա խոսքերով, ԱՄՆ Կոնգրեսի կողմից պայմանագրի վավերացումը աշխարհի համար անվտանգություն ապահովելու ևս մեկ քայլ է և ապացուցում է, որ Միացյալ Նահանգները իրականում շահագրգռված է միջուկային պաշարների կրճատման գործում:
Որպեսզի պայմանագիրը սկսի գործել, անհրաժեշտ է, որպեսզի Ռուսաստանի խորհրդարանը ևս վավերացնի այն: Սակայն քանի որ ՌԴ իշխանություններն ամբողջությամբ վերահսկում են իրավիճակը խորհրդարանում, դա միան տեխնիկայի հարց է: Ռուսները հրաժարվում էին վավերացնել պայմանագիրը, քանի դեռ ԱՄՆ չէր արել դա: Նրանք նույնիսկ ամերիկացի գործընկերներին առաջարկել էին միաժամանակյա վավերացում, սակայն հետո հայտնեցին, որ դա կանեն միայն ամերիկացիներից հետո: Սպասվում է, որ Պետդուման այդ որոշումը կընդունի մոտ օրերս:
Այս պայմանագիրը, որը ենթադրում է միջուկային զենքի զգալի կրճատում, ինչպես նաև իրենց տարածքներից դուրս այսօրինակ զենքի տեղակայման անթույլատրելիություն, ստորագրվել է 2010 թ. ապրիլին ՌԴ նախագահ Դմիտրի Մեդվեդևի և ԱՄՆ նախագահ Բարաք Օբամայի միջև:
Այս մասին հաղորդում են ABC-ն, Bloomberg-ն ու RBC-ն: