2011թ. Հայաստանի երիտասարդական հիմնադրամն իրականացրել է աննախադեպ, առանձնահատուկ ծրագրեր: Այս մասին լրագրողների հետ հանդիպմանը հայտարարեց Հայաստանի երիտասարդական հիմնադրամի հոգաբարձուների խորհրդի համակարգող Կարեն Ավագյանը:
Նրա խոսքով` հիմնադրամն իր գործունեության ընթացքում իրականացրել է մի շարք երիտասարդական ծրագրեր, որոնց թվում «առանձնահատուկ» տեղ է գրավում «Բազե» երիտասարդական փառատոնը, որին, նրա խոսքով, հրավիրվել էին Հայաստանի բոլոր քաղաքական ուժերը ներկայացնող երիտասարդները:
«Այս տարի թե՛ ՀԱԿ-ը, թե՛ «Ժառանգությունը», թե՛ ՀՅԴ-ն «Բազեի» ժամանակ մեզ չմիացան: Դաշնակցությունը միակն էր, որ անցած տարի մեզ հետ էր»,- նկատեց նա` վստահեցնելով, թե հիմնադրամի նպատակը երիտասարդների կողքին գտնվելն է:
Նրա խոսքով` շատերն են փորձում «քաղաքական էլեմենտներ» գտնել հիմնադրամի գործունեության մեջ, սակայն «հիմնադրամի դռները բաց են բոլորի առաջ»:
Հայաստանի երիտասարդական հիմնադրամն ստեղծվել է 2010թ.: