Մեր պահանջն է` անվավեր ճանաչել կառավարության 627 որոշումը: Այսօր լրագրողների հետ հանդիպման ժամանակ իր պահանջը հաստատեց Քաջարան գյուղի գյուղապետ Ռաֆիկ Աթայանը: Նա տեղեկացրեց, որ գյուղը Նախիջևանի սահմանից 3-4 կմ հեռավորության վրա է գտնվում:
«Ունեմ 131 ընտանիք, 270 բնակիչ, որոնք ունեն ընտանիքներ: Նրանք ունեն երեխաներ: Մենք այս պահին 1000 ընտանիք ենք պահում: Ապրիլին ընդունված 627 որոշման համաձայն` պետք է մեր գյուղի հողերն օտարվեին Զանգեզուրի պղնձամոլիբդենային գործարանն ընդլայնելու համար, սակայն ես չեմ համաձայնել ստորագրել այն փաստաթուղթը, որով պետք է հողերն օտարվեն: Ոչ ես եմ տեղյակ եղել, ոչ մարզպետը»,- մանրամասնեց գյուղապետը`հավելելով, որ դիմումներով դիմել է կառավարությանը և նախագահին:
Նա նաև հավելեց, որ դեկտեմբեր ամսին տարածքային կառավարաման նախարարությունից եկել են, տեղում ուսումնասիրել և համոզվել են, որ իր ներկայացրած պահանջներն իրական են: Ըստ Ռ. Աթայանի` քննարկեցին և տեսան, որ այդ ամենը ճիշտ է: Նա պնդեց, որ այսօր իր ժողովուրդը ոչ մի տեղ չունի գնալու:
«Մեր հողը տվող չենք, մեզ ոչինչ պետք չէ, մենք այնտեղ ապրել ենք, ապրելու ենք և հողին հանձնվելու: Մեր պահանջն է` անվավեր ճանաչել կառավարության չարաբաստիկ 627 որոշումը»,- ընդգծեց Ռ. Աթայանը:
Հիշեցնենք, որ կառավարության 627 որոշման համաձայն` Սյունիքի մարզի 6 համայնքների հողերը, որպես հանրային բացառիկ գերակա շահ, տրվում են Զանգեզուրի պղնձամոլիբդենային գործարանին`ընդերքօգտագործման նպատակով:
Համատեղ ասուլիսի ընթացքում «Ժառանգություն» խմբակցության պատգամավոր Զարուհի Փոստանջյանն ասաց, որ կառավարության այս որոշումը կազմվել է ոչ միայն օրենքների խախտմամբ, այլև միջազգային կոնվենցիայի խախտմամբ: Հետևաբար, նրա համոզմամբ, կառավարության այսպիսի որոշումը չի կարող օրենքի սահմաններում գործել:
«Կառավարությանը կոչ ենք անում անհապաղ անվավեր ճանաչել այս որոշումը և հետագայում նաև անդրադառնալ ընդհանրապես հանքարդյունաբերության հայեցակարգին»,- նշեց Զարուհի Փոստանջյանը`հավելելով, որ նման որոշումներ ընդունելուց առաջ պետք են բազմաթիվ քննարկումներ, փորձագիտական եզրակացություններ, նաև պետք է փոխվի տնտեսական հայեցակարգը:
Բնապահպան Եղիա Ներսիսյանը բոլորին կոչ արեց միահամուռ ուժերով այս տարի վերջին անգամ հավաքվել կառավարության շենքի առջև բնապահպանական հզոր ակցիա կազմակերպելու նպատակով: Ակցիան կկազմակերպվի ի պաշտպանություն քաջարանցիների:
