Ռուսական Незвисимая Газета-ի փոխանցմամբ՝ Թուրքիան մտադիր է Կուր գետի վերին հոսանքում կառուցել «Բեշիքայա» հիդրոէլեկտրակայանների կասկադը, ինչը պետք է ուղեկցվի Կուր գետի հունի փոփոխմամբ։ Դրա արդյունքում Կուր գետը կդադարի Թուրքիայից հոսել դեպի Վրաստան, հետևաբար՝ նաև դեպի Ադրբեջան, և Կասպից ծովի փոխարեն կթափվի Սև ծով։
Նշվում է, որ այս սկանդալային նախագիծը քննարկվել է ոչ վաղ անցյալում Վրաստան այցելած Թուրքիայի Ազգային մեծ ժողովի (ԹԱՄԺ) պատվիրակության անցկացրած հանդիպումներում։ Ավելին, թիբիլիսյան «Ռեզոնանսի» թերթի տեղեկություններով՝ այս հարցն արծարծվել է անգամ Թուրքիայի վարչապետ Ռեջեփ Էրդողանի և Վրաստանի նախագահ Միխեիլ Սաակաշվիլիի միջև տեղի ունեցած հանդիպումներից մեկի ժամանակ։
«Բեշիքայա» հիդրոէլեկտրակայանների կասկադը կառուցվելու է Վրաստանին սահմանակից Արդահան նահանգում, և տեղանքի ռելիեֆի յուրահատկության պատճառով անհաժեշտություն է առաջանում փոխել գետի հունը։ Այս նախագծի իրագործումը ողջ տարածաշրջանին սպառնում է բնապահպանական աղետով։
Նախագծի իրագործման արդյունքում Վրաստանը և մասնավորապես Թբիլիսին կզրկվեն Անդրկովկասի գլխավոր ջրուղուց, իսկ Ադրբեջանի համար այս գետն ունի ռազմավարական նշանակություն՝ հաշվի առնելով, որ Մինգեչաուրի ջրամբարը սնվում է հենց Կուրից։
Հիշեցնենք, որ այս տարվա ապրիլի սկզբին Վրաստանի «Կանաչների» կուսակցության ղեկավար Գիորգի Գաչեչիլաձեն հայտարարել էր, որ Սև ծովի փոփոխությունների պատճառով Վրաստանը տարածքային կորուստներ է կրել, ինչի մեղավորը թուրքական կողմն է.
«Երբ թուրքերն ամբարտակներ կառուցեցին Ճորոխ գետի վրա, մեր ափամերձ հատվածը սկսեց կորցնել իր հիմնական նյութը` ավազն ու քարը: Դրանք այստեղ էին հասցվում Ճորոխ գետի միջոցով, որը Սև ծով է թափվում Վրաստանի տարածքում` Բաթումի մերձակայքում:
Մինչդեռ այժմ գետի վրա կառուցված ամբարտակների պատճառով դրանք մնում են Թուրքիայում, իսկ ահա, ասենք, Բաթումում ծովն ավելի է խրվում ափի մեջ: Օրինակ՝ Փոթիում ծովն արդեն առաջ է շարժվել 1 կիլոմետրով, ինչի արդյունքում այնտեղ ջրի տակ են հայտնվել մի շարք շինություններ»: