Եվրոպական ազատական գաղափարների ազդեցությամբ մեզանում էլ է շատանում միասեռականների թիվը: Խորհրդային տարիներին շատ խիստ էր վերաբերմունքը նրանց հանդեպ, տոլերանտությունը շատացել է, ինչի արդյունքում նրանց թիվն է ավելացել: «Առաջին լրատվական»-ի հետ զրույցում ասաց հոգեբան Սամվել Խուդոյանը` անդրադառնալով մեզանում ավելի շատ հանդիպող միասեռականների ու լեսբուհիների գոյության փաստին:
Այն, որ ավանդական սեռական կողմնորոշումից շեղվող մարդիկ բոլոր ժամանակներում էլ եղել են, հոգեբանը համաձայնեց, բայց նշեց, որ օրինակ` խորհրդային շրջանում նրանք վախեցել են իրենց դրսևորել: «Եթե վերցնենք միջին, թույլ և սուր արտահայտված վիճակները, կարելի է ասել, որ միջին ու թույլ վիճակում գտնվողները զսպում էին իրենց` վախենալով կոնֆլիկտներից, օրինակ, հենց իրենց բակում, շրջապատում, քաշվելով հարազատ-բարեկամներից, անգամ ոստիկանները կարող էին նրանց բռնել»,- ասաց հոգեբանը` ընդգծելով, որ դրանում` որպես հոգեբան, բացասական երևույթ է նկատում, ինչը կապ չունի ազատության հետ:
Հոգեբանի խոսքով, տրանսսեքսուալիզմի դեպքում այդ դրսևորումները 90 տոկոս դեպքերում վկայում են հոգեկան հիվանդության առկայության մասին: «Մենք գործ ունենք հոգեկան հիվանդների` տրանսսեքսուալների հետ, որոնք իրենց կին կամ տղամարդ են զգում, և դա ապացուցված է: Ստացվում է զառանցանք»,- հավելեց Ս. Խուդոյանը:
Մեր այն դիտարկմանը, թե ավանդական սեռական կողմնորոշում չունեցող մարդիկ չե՞ն ընդունում իրենց` հոգեկան հիվանդ լինելու փաստը, վերջինս պատասխանեց, թե «չեն ընդունում, դրա համար էլ հիվանդություն չէ»: «Եթե որևէ մեկը հոգեբուժարանում հայտարարի, որ ինքը Նապոլեոնն է, և մի 10 մարդ ընդունի այդ փաստը, նա էլ գիժ չի համարվի: Երբ կինն ասում է` ես տղամարդ եմ կամ հակառակը, հասարակությունն էլ դա ընդունում է, տվյալ դեպքում արդեն դա որպես հիվանդություն չի դիտվում, քանի որ հոգեբանական օրենք է»,- ընդգծեց զրուցակիցս` հավելելով, որ շիզոֆրենիա հիվանդությունը այդպիսի դեպքերում չի դրսևորվում, հանդես չի գալիս:
Նրա խոսքով, շատ աղանդավորական շարժումների առաջնորդներ շիզոֆրենիկներ են, սակայն կարողանալով հավատացնել մարդկանց, որ օրինակ` իրենք Փրկիչն են, այլևս դադարում են ընկալվել որպես շիզոֆրենիկներ, իսկ ովքեր չեն կարողանում` հայտնվում են հոգեբուժարաններում:
Այն հարցին` հայ հասարակության համար միասեռականներն արդյոք վտանգ ներկայացնում են, հոգեբանը միանշանակ պատասխանեց, որ նորմալ ընտանիքներ չեն կազմվում, նորմալ երեխաներ չեն ունենում: «Տեղից էլ մի բուռ ազգ ենք, վտանգ չէ, ի՞նչ է: Ամերիկացիների, չինացիների համար գուցե վտանգավոր չէ, քանի որ միլիոններ են, բայց մեզ համար այդ երևույթը վտանգ է ներկայացնում»,- նկատեց վերջինս` հավելելով, թե մեզ համար վտանգ է անգամ 2 մարդու գնալը հանրապետությունից, եթե մի քանիսն էլ անգամ լինեն «գեյեր» ու «լեսբուհիներ»՝ էլի վտանգավոր է:
Լուսանկարները՝ mamul.am-ի
