Քաղտեխնոլոգ Կարեն Քոչարյանին «Առաջին լրատվական»-ը հարց ուղղեց, թե գալիք տարում ի՞նչ հնարավոր տրանսֆորմացիաներ կարող են լինել քաղաքական դաշտում և ի՞նչ դաշինքներ կարող են ձևավորվել:
«Դաշինքները չեն բացառվում թե՛ ընդդիմադիր, թե՛ իշխանական դաշտում: Օրինակ` իշխանությունը կարող է գնալ միասնական ցուցակով, կոալիցիայով, սա չի բացառվում: Այսինքն` դաշինքներ հնարավոր են: Բայց խոսքը կողքից «կմճտողների» մասին չէ, այլ խոսքը ռեալ ուժերին է վերաբերում: Ընդդիմադիր դաշտում, ես կարծում եմ, ավելի շատ կարող են լինել գեոաքաղաքական դաշինքներ: Այսինքն` «Ժառանգություն», «Ազատ դեմոկրատներ» ֆորմատով, չի բացառվում, օրինակ, նաև` ՄԱԿ-ը: Կարող են համախմբվել նաև ռուսական ուղղվածության ուժերը և դաշինքներ ստեղծել: Ինչ վերաբերում է ՀԱԿ-ին` նա արդեն իսկ ձևավորված է մեկ անձի շուրջ` անկախ վեկտորներից»: Կարեն Քոչարյանը հավելեց նաև, որ առայժմ վաղ է խոսել դաշինքների ձևավորման մասին:
«Առաջին լրատվական»-ի հարցին՝ հնարավո՞ր է, որ 2012թ. նոր գլխավոր խաղացողներ ի հայտ գան, մի քանի ամսվա ընթացքում ինչ-որ հավակնություններ ի ցույց դնեն. «Չեմ հավատում: Իհարկե ամեն ինչ հնարավոր է, չէ՞ որ ասում են` երբեք մի ասա երբեք, բայց ես քիչ հավանական եմ համարում, որ ստեղծվի մի այնպիսի ուժ, որը լուրջ դերակատարություն ունենա քաղաքական դաշտում… Հնարավոր է մի այդպիսի ուժ հինգ տոկոս տանի, այսպես ասած` «կմճտի», բայց ռեալ ուժ, այնպիսին, ինչպիսին եղավ ՀԱԿ-ի պարագայում, դժվար թե լինի, չեմ կարծում, որ երկու-երեք ամսում հասցնեն նման ուժ ձևավորել»:
