25 տարվա ընթացքում ԱՄՆ-ում աղքատների և հարուստների միջև անդունդն ավելի է մեծացել, ընդ որում՝ դա առաջին հերթին նկատելի է հասարակ ընտանիքների և Կոնգրեսի ներկայացուցիչների եկամուտները համեմատելիս: Այս մասին գրում է The Washington Post թերթը:
1984-2009թթ. ընթացքում Կոնգրեսի Ստորին պալատի անդամների անձնական կարողությունը ավելացել է ավելի քան 2 անգամ՝ 280 հազար դոլարից հասնելով 725 հազար դոլարի: Այս գումարի մեջ չի մտնում անշարժ գույքի արժեքը: Մյուս կողմից՝ ամերիկյան ընտանիքների կարողությունը նույն ժամանակահատվածում աննշան կրճատվել է՝ 20.6 հազար դոլարից հասնելով 20.5 հազար դոլարի:
Թերթը նշում է, որ անշարժ գույքի արժեքը այս թվերում ներառված չէ, քանի որ դա ներառված չի եղել կոնգրեսականների եկամուտների հաշվետվության մեջ, իսկ 1984թ. ընդունվել է սկզբնակետ, քանի որ նրանց կարողությունների ծավալը հասանելի է միայն այդ թվականից:
Թերթի հոդվածագիրը նշում է, որ ԱՄՆ-ում կոնգրեսականները միշտ էլ հարուստ են եղել հասարակ քաղաքացիներից: Վերջին տարիներին ԱՄՆ-ում ունևորների բարօրությունն ավելի արագ է աճում, քան միջին եկամուտ ունեցող քաղաքացիներինը: Հոդվածագիրը դրա ևս մեկ հնարավոր պատճառ է համարում այն հանգամանքը, որ նախընտրական քարոզարշավի արժեքը երկրում բավականին թանկացել է, ուստի ընտրություններին մասնակցել կարող են իրենց թույլ տալ միայն ունևոր ամերիկացիները:
