Այսօր լրագրողների հետ հանդիպման ժամանակ անցնող տարին ամփոփեցին և ապագա ծրագրերի մասին խոսեցին երիտասարդական հանձնաժողովի անդամները:
«Մեր ՀԿ-ի նպատակն է երիտասարդների խնդիրներին հրատապ լուծումներ տալ։ Տարվա սկզբում մենք հանդիպել ենք տարբեր բուհերի ուսանողական խորհուրդների նախագահների հետ և փորձել ենք վեր հանել այն խնդիրները, որոնք առկա են այդ բուհերում»,-ասաց երիտասարդական ենթահանձնաժողովի նախագահ Հռիփսիմե Մարգարյանը: Վերջինս հատկապես կարևորեց տրանսպորտի խնդիրը՝ առաջարկելով, որ ունենանք այնպիսի տրանսպորտային միջոցներ, որոնք ուղղված կլինեն միայն դեպի բուհեր. դրանք կլինեն վճարովի, բայց կթեթևացնեն ուսանողների հոսքը դեպի բուհեր:
Առկա խնդիրներին անդրադառնալով՝ ենթահանձնաժողովի անդամ Լևոն Հովհաննիսյանը կարևորեց Հայաստան-Սփյուռք երիտասարդական կապերը: «Այսօր մենք ունենք բազմաթիվ հայրենասեր երիտասարդներ, ովքեր ուզում են գալ Հայաստան, սակլայն այն գները, որ առաջարկում են ավիաուղիները, բավական թանկ են և մատչելի չեն երիտասարդների համար»։
Նրանք կարևորեցին նաև երիտասարդների ռազմահայրենասիրական դաստիարակությունը՝ առաջարկելով, որ բուհերում անցկացվեն նախնական զինվորական պատրաստության դասընթացներ:
