ԱԺ փոխնախագահ Սամվել Նիկոյանը մամուլի ասուլիսի ժամանակ, անդրադառնալով ընդդիմության դերին, նշեց, որ կան մարգինալ ընդդիմադիրներ, որոնք զբաղված են բանակը վարկաբեկելով: «Բացեք թերթերը և տեսեք, թե ովքեր են զբաղված դրանով»,- լրագրողներին «խորհուրդ» տվեց նա: «Առաջին լրատվական»-ի դիտարկմանը, թե արդյոք բանակում տեղի ունեցող սպանությունների մասին չպե՞տք է բարձրաձայնել, Սամվել Նիկոյանն արձագանքեց. «Բանակի մասին շատ մտահոգ մարդիկ են բարձրաձայնել, իրենց տեսակետները հայտնել և ցանկացել են, որ բանակը լինի ավելի թափանցիկ, ավելի հրապարակային, ավելի կարգապահ: Դա մտահոգ մարդկանց տեսակետ է: Բայց Դուք ինքներդ կարող եք տարբերել այդ մարդկանց տեսակետներն այն տեսակետներից, որոնցով փորձ է արվում խարխլել, հեղինակազրկել բանակը, անվստահություն առաջացնել, որ նա թույլ է, որ անընդունակ է, այս է, այս է, այս է»: Սամվել Նիկոյանն ասաց, որ, երբ նման գնահատականներ են հնչում հայկական մամուլում, ապա ժամանակ անց նույն գնահատականները հայտնվում են նաև ադրբեջանական մամուլում: Պատասխանելով լրագրողների` մարտի 1-ի սպանությունների բացահայտմանը վերաբերող հարցին` Սամվել Նիկոյանն ասաց, որ ինքը ժամանակին, որպես «Մարտի 1-ի դեպքերը հետաքննող» հանձնաժողովի նախագահ, 150 էջանոց զեկույց է գրել և ավելացնելու ոչինչ չունի:
