«Փարիզյան սուրճի» տիրուհին՝ Վալերի–Աշխեն Գործունյանը հեռանում է Հայաստանից: Ընկերությունը վաճառվում է: Գործարար կինը Հայաստանից հեռանում է Հարկային պետական տեսչության հետ ունեցած խնդիրների պատճառով։ Այս կապակցությամբ «Ժառանգություն» խմբակցության քարտուղար Ստյոպա Սաֆարյանն այսօր նամակ է հղեր Տիգրան Սարգսյանին, որում մասնավորապես ասված է.
Հարգելի պարոն վարչապետ,
Հայկական ԶԼՄ-ները արդեն ահազանգում են, որ «Փարիզյան սուրճի» սեփականատեր Վալերի–Աշխեն Գործունյանը հեռանում է Հայաստանից` վաճառելով իր ընկերությունը: Ինչպես տեղեկանում ենք տիկին Գործունյանի կենդանի խոսքից, նա հեռանում է Հայաստանից` բիզնեսում ունեցած խնդիրների պատճառով, որովհետև մեր երկրում բիզնեսի գոյատևման համար հարկավոր է «կռիշ» և որ Հայաստանում քաղքացին, գործարարը պաշտպանված չեն։ Նրա ղեկավարած ընկերության հարկային պարտավորությունների հետ կապված գոյացել է մեծ պարտք, որը նա համաձայն է վճարել որոշակի ժամանակահատվածի ընթացքում, սակայն երկրիս բյուրոկրատիայի կողմից այդ հնարավորությունը չի տրվել նրան, և, պահանջվել է պարտքը վճարել «24 ժամվա ընթացքում»։
Եւս մեկ հայազգի գործարարը, ով 16 տարի շարունակ Հայաստանում է և իր հայրենիքում ներդրել է ոչ միայն փողեր, այլև իր կյանքի լավագույն տարիները, ըստ էության խոստովանում է այն անտանելի պայմանների մասին, որոնցում ոչ միայն հնարավոր չէ բիզնես զարգացնել, այլև ապրել ու մնալ:
Մի՞թե սա համաշխարհային մեծություն և ՀՀ դեսպան Շառլ Ազնավուրի ասած ներքին ցեղասպանության շարունակություն չէ, չնայած որ իշխանությունների ջանադրությամբ պետական լրատվամիջոցով ազդարարվեց, թե մեծն շանսոնյեի խոսքերը սխալ են թարգմանվել: Մի՞թե սա է Հայկական աշխարհը, որտեղից հեռանում են ոչ միայն այս հողի վրա հազարամյակներով ապրած, ստեղծագործած ու պայքարած մարդկանց ժառանգները, այլև հայրենադարձ մեր հայրենակիցները, ովքեր առանց ձեր «Արի տուն» կանչի եկել են, բայց սրտի կսկիծով հեռանում են այն ժամանակ երբ Ձեր կառավարությունն է “կանչում”:
Ձեր կառավարության նախարարները վերջին տարիներին ԱԺ-ում օրենքների ընդունման հիմնավորումները ներկայացնելիս անընդհատ շեշտում են բիզնես միջավայրի բարելավման նպատակը, բայց պարզվում է` դրան զուգահեռ գործարարները վկայում են այդ պայմանների վատթարացման մասին:
Խոսում եք հարկային ոլորտի բարեփոխումներից, բայց այդ բարեփոխումների հետևանքը սա է, երբ մեր երկրիս հարկային մարմինն ու դատարանը փաստացի «անցանկալի անձի» համար երկիրը լքելու ժամանակ են տալիս նաև հայրենադարձ գործարարին:
Ձեր գլխավորած կառավարության ընդունած որոշման կատարողները այս օրերին Սյունիքի Քաջարան գյուղի բնակիչներին հորդորում են իրենց նախնիների գերեզմանները առնել ու տեղափոխվել սահմանապահ այդ գյուղից, որպեսզի կառավարության բարեհաճությունը վայելող պղնձամոլիբդենային կոմբինատը /որին 1 տարի առաջ վարկ էլ տվեցիք` ռուսական 500 միլիոն դոլարի պարտքից, որը մենք բոլորս ենք վճարելու/ ազգային հարստությունը խտանյութի տեսքով կոպեկներով վաճառի օտարին:
Պարոն Վարչապետ,
Ձեզանից ոչ մեկ չի էլ հետարքրվում, թե մարդիկ ինչո՞ւ են հեռանում սեփական հայրենիքից: Ձեր իշխանության ներկայացուցիչներն անգամ արդարացնում ու հիմնավորում են դա, որպես ժամանակակակից գլոբալացվող աշխարհի օրինաչափություն, իսկ դուք էլ ժամանակին կատակեցիք այդ թեմայով:
Այս և համանուն բազմաթիվ քայլերով մի՞թե իսկապես իրականացնում եք պետության վախճանը, ինչի մասին գրել եք տարիներ առաջ:
Ի՞նչ եք պատրաստվում անել, որ Վալերի–Աշխեն Գործունյանը, նրա նմանները և մեր հայրենակիցները մնան Հայաստանում;
Համարեք, որ 24 ժամ ունի ոչ միայն Վալերի–Աշխեն Գործունյանը, այլև դուք: Որովհետև եթե նա այդ 24 ժամվա ընթացքում չվճարի իր պարտքը, ապա դրանից հետո ոչ մեկին պետք չի լինի թե Ձեր օգնությունը, թե ձեր տեսությունը և թե ձեր կառավարումը:
Հարցազրույցը՝ 12 հեռուստաընկերության:
