«Առաջին լրատվական»-ի խնդրանքով հրապարակախոս Հրանտ Տեր-Աբրահամյանը մեկնաբանեց այսօր ԱԺ-ի կողմից «Լեզվի մասին» և «Հանրակրթության մասին» օրենքներում փոփոխությունների նախագծի ընդունումը:
«Լեզվի մասին» օրենքի ընդունմամբ մի նոր ջրբաժան սահմանվեց: Հայաստանի քաղաքական վերնախավը տարանջատեց իրեն ՀՀ քաղաքացիներից նաև լեզվի հատկանիշով: Ինչպիսի հեքիաթներ էլ նրանք պատմեն օտարալեզու դպրոցների մասին, պարզ է, որ հայերենը Հայաստանի տարածքում այլևս պաշտոնապես դիտվում է որպես մի տեսակ էթնիկ փոքրամասնության լեզու: Բայց Հայաստանի Հանրապետությունը էլիտան չէ, այլ Հայաստանի հանրությունը: Եթե էլիտան մեզ մարտահրավեր է նետում, ապա մենք ոչ թե պետք է ընկճվենք, այլ ավելի մոբիլիզացվենք: Հայերենը այսուհետ մեր՝ հանրության պատասխանատվության ներքո է, քանի որ կառավարությունն այն ստորացրեց ու արհամարհեց: Հայերենը պետք է լինի ուշադրության կենտրոնում: Բոլորս պարտավոր ենք ապահովել հայերենի կատարյալ հաղթանակը մրցակցության մեջ: Պետք է զգանք մեզ այնպես, ինչպես զգում էր Մաշտոցի սերունդը: Այս մեծ նպատակին հասնելու կոնկրետ միջոցների մասին առաջիկայում պետք է բոլորս մտածենք, բայց, ամեն դեպքում, հուսով եմ, կլինենք կոշտ, վճռական, ոգեշնչված, եթե պետք լինի՝ դաժանության աստիճանի, այնպես, ինչպես կլիներ բանակը պատերազմի հայտարարության պահին»:
