Դեկտեմբերի 14-ին ենթասպայի բռնարարքի հետևանքով աջ աչքից զրկված Նարեկ Ավետիսյանը դեկտեմբերի 28-ին դուրս կգրվի Երևանի Մալայանի անվան ակնաբուժական կլինիկայից: «Առաջին լրատվական»-ին այս մասին տեղեկացրեց Նարեկ Ավետիսյանի հայրը` Անդրանիկ Ավետիսյանը: Նա նաև ասաց, որ հիվանդանոցից դուրս գրվելուց հետո Նարեկը շարունակելու է մնալ բժիշկների վերահսկողության տակ:
«Օրը մեջ կամ ամեն օր պետք է լինի բժիշկների հսկողության տակ, քանի որ բուժումը շարունակվում է. աչքի փոխարեն տեղադրված պրոթեզն է մշակվում այս պահին, բայց միևնույն է՝ այլևս տեսողությունը չի վերականգնվելու»,- մանրամասնեց Ա. Ավետիսյանը`հավելելով, որ Նարեկը դեռ ոչինչ չգիտի: Նա կարծում է, թե շուտով աչքի բուժումն ավարտվելու է, և ինքը կվերադառնա ծառայության:
Անդրադառնալով ենթասպա Արմեն Թովմասյանի կալանավորմանը` Ա. Ավետիսյանն ասաց, որ ի սկզբանե դեմ է եղել, որ նրան առաջադրվի այնպիսի մեղադրանք, որի համար պետք է ազատազրկվի 2-5 տարի ժամկետով: «Ինձ ասել են, որ երկու ամիս կալանք է լինելու, եթե այդ հոդվածը չդրվեր, չէին կարող 72 ժամից երկար պահել: Ժամանակավոր երկու ամսով կալանավորել են մինչև դատավարության ավարտը: Հնարավոր է և անպայման պետք է հոդվածը փոխվի»,- նման կարծիք հայտնեց Նարեկի հայրը:
Նշենք, որ ենթասպա Արմեն Թովմասյանին մեղադրանք է առաջադրվել քրեական օրենսգրքի 375 հոդվածի 1-ին մասով: Այն սահմանում է պետի կամ պաշտոնատար անձի կողմից իշխանությունը, պաշտոնական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը, ինչպես նաև իշխանության անգործությունը, եթե այդ արարքները կատարվել են շահադիտական, անձնական այլ շահագրգռվածության կամ խմբակային շահերից ելնելով: Այս հոդվածով մեղադրվողները ազատազրկվում են 2-5 տարի ժամկետով:
Հիշեցնենք, որ օրեր առաջ Facebook սոցիալական ցանցում բացվել է նախաձեռնություն` «Ամանորյա նվեր` Նարեկին», որի միջոցով ցանկացողները գումար կփոխանցեն Նարեկի համար ամանորյա նվեր պատրաստելու համար:
