ԱՄՆ-ում Nike ապրանքանիշի նոր մոդելի մարզակոշիկների վաճառքն ուղեկցվել է անկարգություններով: Այս մասին հայտնում է BBC-ն:
Գնորդները, որոնք մի քանի ժամ սպասել էին խանութների բացմանը, կռիվ են սկսել, որպեսզի առաջինը մտնեն խանութ և ձեռք բերեն երանելի մարզակոշիկները: Խանութի աշխատակիցները ստիպված են եղել ոստիկանություն կանչել:
Վաշինգտոն նահանգի Սիեթլ քաղաքում ոստիկաններին հաջողվել է կրքերը հանդարտեցնել արցունքաբեր գազի օգնությամբ: Գնորդներից մեկը հարվածել է ոստիկանին և այժմ նրան քրեական պատասխանատվություն է սպառնում:
Ջորջիա նահանգի Լիտոնիա քաղաքում ևս խանութների դռների մոտ մեծ հերթեր են գոյացել: Կալիֆոռնիայի Սթոքթոն քաղաքում գողերը սխալմամբ հարձակվել են անցորդի վրա` կարծելով, թե նրա ձեռքին նոր գնված մարզակոշիկներն են: Անկարգություններ են եղել նաև Հյուսիսային Կարոլինայում, Միչիգանում, Ինդիանայում: Այս դեպքերի առնչությամբ Nike-ը դեռ մեկնաբանություն չի տվել:
Air Jordan 11 Retro Concords-ի նոր մոդելը դասական սև-սպիտակ Air Jordan սպորտային կոշիկների ռետրո-տարբերակն է: Շատ գնորդներ ասում են, որ չեն պատրաստվում այն կրել, այլ գնում են միայն հավաքածուի համար:
Մարզակոշիկն արժե 180 դոլար, սակայն eBay պորտալում գինը հասել է 605 դոլարի:
