Ցեղասպանության հերքումը քրեականացնող օրինագծի ընդունումը Ֆրանսիայի պատասխանն էր Թուրքիայի դիվանագիտությանը: «Առաջին լրատվական»-ի հետ զրույցում նման տեսակետ հայտնեց քաղաքագետ Ռուբեն Մելքոնյանը`անդրադառնալով երեկ Ֆրանսիայի ԱԺ-ում ընդունված օրինագծին: Քաղաքագետը սա դրական զարգացում է համարում:
Նա նշեց, որ վերջին օրերին ականատես դարձանք, թե ինչպես է թուրքական քաղաքական մեքենան իր զինանոցի բոլոր զենքերն օգտագործում, որպեսզի այդ օրինագիծը տապալվի: Ռ. Մելքոնյանը կարծում է, որ օրինագծի ընդունմամբ հաստատվեց Ֆրանսիայի դիրքորոշումը ԵՄ անդամակցության վերաբերյալ:
«Ցեղասպանության միջազգային ճանաչումը մտել է որակական նոր մակարդակ, և այն կասեցնելը խիստ դժվար է դարձել թուրքական պետության համար: Այս օրինագիծը ևս մեկ անգամ ամբողջ միջազգային հանրությանը հիշեցրեց Հայոց ցեղասպանության մասին»,- ասաց քաղաքագետը`հավելելով, որ ճանաչման գործընթացին դինամիկա կհաղորդի օրինագծի ընդունումը:
