Ավելի քան 6000 մարդ է մահացել Սիրիայում 2011 թվականի մարտից սկսված ցույցերի հետևանքով: Այս մասին հայտնում է Al-Shark Al-Awsat թերթը՝ հղում անելով միջազգային ոչ կառավարական «Աֆազ» կազմակերպության հատուկ զեկույցին:
Նրա տվյալներով՝ մարտի 15-ից դեկտեմբերի 9-ը զանգվածային ցույցերը ցրելու հետևանքով «ամբողջ երկրում սպանվել է 6237 սիրիացի, ավելի քան 69 հազար մարդ ձերբակալված է»:
«Աֆազը» վստահեցնում է, որ ինը ամիսների ընթացքում ամեն 300 սիրիացուց մեկը կամ ձերբակալվել է, կամ սպանվել: Առավել շատ զոհեր են գրացվել Հոմսում` ընդհանուր զոհերի 40 տոկոսը:
Զեկույցում նշվում է, որ 32 հազար ձերբակալված ազատ արձակվել, իսկ մնացած 37 հազարի ճակատագիրը պարզ չէ:
«Աֆազ»-ի գործադիր տնօրեն Բատիլ Ռիկան հայտարարել է, որ կազմակերպությունը մանրամասն ստուգել է ստացված տվյալները. յուրաքանչյուր դեպք հաստատվել է երեք անկախ աբյուրների կողմից, ինչպես նաև սպանվածի կամ ձերբակալվածի հարազատներից:
Հիշեցնենք, որ 2011 թվականի մարտից Սիրիայում շարունակվում են զանգվածային անկարգությունները և զինված ելույթները երկրի իշխանությունների դեմ: Ցուցարարները պահանջում են Բաշար Ալ-Ասադի հեռացումը և ժողովրդավարական բարեփոխումենրի անցկացում: Իշխանությունները գնացել են որոշ զիջումների: ՄԱԿ-ի տվյալներով՝ Սիրիայում զոհերի թիվը գերազանցել է 5000-ը:
Սիրիայի պաշտոնական տվյալների համաձայն՝ ընդհարումների հետևանքով զոհվել են ավելի քան 2000 զինծառայողներ և իրավապահ մարմինների աշխատակիցներ: Սիրիայի իշխանությունները հայտարարում են, որ կառավարական զորքերի դեմ գործում են լավ զինված զինյալներ:
