Ռուսական Regnum լրատվական գործակալության փոխանցմամբ՝ ռուս փորձագետ Ստանիսլավ Տարասովն անդրադարձել է Ֆրանսիայի խորհրդարանում Հայոց ցեղասպանության հերքումը քրեականացնող օրինագծի ընդգրկման հետ.
«Թուրքական մամուլը հեղեղված է այդ օրինագծի և դրա ընդունման դեպքում թուրք-ֆրանսիական հարաբերությունների վրա օրինագծի ազդեցության մասին լուրերով ու վերլուծություններով։ Թուրքիայում շատերը կարծում են, թե այդ օրինագծի ի հայտ գալը պայմանավորված է Ֆրանսիայի առաջիկա նախագահական ընտրություններով, այսինքն ֆրանսահայ համայնքի քվեները ստանալով։ Սակայն պետք է հիշել, որ Ֆրանսիայում բնակվում է մինչև կես միլիոն հայեր և 7 միլիոն մուսուլման՝ հիմնականում Հյուսիսային Աֆրիկայից։
Հայերի այդ քանակը քաղաքական եղանակ չի ստեղծում ընտրություններում, իսկ մուսուլմաններն էլ բարյացակամ են տրամադրված թուրքական խնդիրների նկատմամբ։ Հարց է առաջանում. իսկ ինչո՞ւ հենց հիմա հայտնվեց այդ օրինագիծը։
Ֆրանսիայի նախագահ Նիկոլա Սարկոզին որոշել է Մերձավոր Արևելքում «Արաբական գարնան» թեժ պահին առավելագույն կերպ ընդլայնել Եվրոպայի ու Թուրքիայի միջև «պատմական անդունդը», բարդացնել Անկարայի հնարավորությունները ԵՄ-ին անդամակցելու հարցում, սահմանափակել Թուրքիայի մանևրելու հնարավորությունները եվրոպական ու մերձավորարևելյան ուղղություններով։
Պատահական չէ, որ թուրք-ֆրանսիական ներկայիս ճգնաժամը համընկավ այն պահի հետ, երբ Սիրիայի ճգնաժամի կարգավորման շրջանակներում ի հայտ եկան թուրք-ֆրանսիական հարաբերությունների կարգավորման նախանշանները։ Թուրքական Milliyet թերթը կարծում է, որ տեղի ունեցածը կարող է փոխել Սիրիայի շուրջ ուժերի դասավորվածությունը։
Ֆրանսիան իր հետևից կտանի արաբներին՝ «Արաբական գարնան» խառնարանում թողնելով միայն Թուրքիային։ Ավելի վաղ Փարիզն այդպիսի օպերացիա է իրականացրել Լիբիայի նկատմամբ՝ Թուրքիային կտրելով Արևմուտքի այդ նախագծից։ Դա շատ վատ ազդանշան է Թուրքիայի համար։
Թուրքիայի վարչապետ Էրդողանը ֆրանսիական կողմին շարունակ զգուշացնում է, որ դա Ֆրանսիայի գործը չէ, այլ միայն Թուրքիայի ու Հայաստանի գործն է։ Էրդողանը զարմանք էր արտահայտել, թե ի՞նչ գործ ունի Ֆրանսիան Թուրքիայի ու հայերի խնդրի հետ։ Բայց չէ՞ որ դրանից բխում է հանդիպակաց հարցը. իսկ ե՞րբ է Թուրքիան լիազորություններ ստացել լուծելու Հայաստանի ու Ադրբեջանի խնդիրները»։