Այս տարի աննախադեպ և հատկանշական էր ՀԱԿ-իշխանություն երկխոսությունը: «Առաջին լրատվական»-ի հետ զրույցում նման տեսակետ հայտնեց «Ազգ» օրաթերթի գլխավոր խմբագիր Հակոբ Ավետիքյանը`ամփոփելով տարին և անդրադառնալով տարվա ընթացքում ամենանշանակալի իրադարձություններին: Նրա համոզմամբ, ամենաուշագրավը ՀԱԿ-իշխանություն երկխոսությունն էր: «Դժբախտաբար, այն չարդարացավ որպես բովանդակություն, բայց ունեցավ մի դրական ազդեցություն. դա այն էր, որ մթնոլորտը, որը շիկացած էր, մեղմացավ»,- նշեց Հ. Ավետիքյանը:
Երկրորդ խնդիրը, որի վրա սևեռվեց բոլորի ուշադրությունը, ըստ «Ազգ» օրաթերթի գլխավոր խմբագրի, ՀՀԿ-ԲՀԿ հարաբերություններն էին: Հ. Ավետիքյանը նկատեց, որ երկու կողմերի լռությունը մեծ տեղ զբաղեցրեց մամուլի էջերում և դեռևս մնում է չհստակեցված: «Եթե հստակ չէ, այդ պարագայում դուռը բաց են թողնում սխալ ենթադրությունների առջև: Ես զարմանում եմ, որ երկուստեք երկրորդական մակարդակի պատասխանատուները զարմանում են մեր զարմանքի վրա»,- նման կարծիք հայտնեց Հ. Ավետիքյանը:
«Ազգ» օրաթերթի գլխավոր խմբագիրը նաև հատկանշական համարեց մամուլի դեմ դատական հայցերը, որոնք, ըստ նրա, և դրական են, և բացասական: «Լավն այն է, որ ոչ թե ծեծուջարդ սպառնալիք, ոչ թե հրկիզում, ինչի ականատեսն ենք դարձել մենք բոլորս, այլ դատական գործընթաց: Սա առաջընթաց չէ, որովհետև Հայաստանում դատական իշխանությունները անկախ չեն»,- մեկնաբանեց Հ. Ավետիքյանը`հավելելով, որ այս հարցը մնում է առկա, և այստեղ մամուլի և այլ լրատվամիջոցների ղեկավարներն անելիք ունեն:
Նրա խոսքով, հրաժարականները նույնպես մեծ քննարկումների տեղ տվեցին: «Աղմկահարույցը քաղաքապետի հրաժարականն էր, այնուհետև Հ. Աբրահամյանի հրաժարականը: Այս բոլորը ցույց են տալիս, որ գլխավոր կողմը պատրաստվում է հերթական խորհրդարանական ընտրություններին»,- նշեց Հ. Ավետիքյանը`հավելելով, որ գլխավոր կողմն ամեն մակարդակի վրա հավաքում է իր մարդկանց:
