Ավստրալիայի տեխնոլոգիական համալսարանի գիտնականները ուսումնասիրել են այսպես կոչված «27 ակումբ» ֆենոմենը՝ այն հայտնի հիպոթեզը, որի համաձայն՝ տաղանդավոր ռոք երաժիշտների համար նախասահմանված տարիքը 27-ն է:
Ինչպես հաղորդում է բրիտանական The Daily Telegraph պարբերականը, գիտնականներն ուսումնասիրել են այդ երաժիշտների կենսագրականները և պարզել, որ իրականում ոչ մի «27 ակումբ» էլ չկա, 27 տարեկանում երաժիշտները մահանում են ոչ ավելի հաճախ, քան արվեստի այլ բնագավառներում:
«27 ակումբի» ուսումնասիրության համար սոցիոլոգներն օգտագործել են 1046 երաժիշտների (մենակատարներ և խմբի անդամներ) մահվան տվյալները, որոնց 1956-2007 թթ. ընթացքում հաջողվել է հայտնվել բրիտանական հիթ շքերթների վերին հորիզոնականներում: Այդպիսի երաժիշտների թվում են Ջիմի Հենդրիքսը, Ջիմ Մորիսոնը, Քուրտ Քոբեյնը և այլք:
Վերլուծելով ստացված տվյալները՝ մասնագետները պարզել են, որ 27-ը ճակատագրական տարիք չէ ռոք երաժիշտների համար: Այնուամենայնվ, երաժիշտներն ավելի վաղ են մահանում, քան «սովորական» մարդիկ, և շատերը մահանում են մինչև 40 տարեկանը: Այսպիսով, գիտնականները եզրակացնում են, որ «27 ակումբի» գոյությունը փաստերի ոչ օբյեկտիվ հավաքման և պատահական զուգադիպությունների արդյունք է:
«27 ակումբի» նկատմամբ հետաքրքրության նոր ալիք բարձրացավ այս տարվա ամռանը, երբ 27 տարեկանում մահացավ բրիտանացի երգչուհի Էմի Ուայնհաուսը:
