Ամերիկյան Dow Chemical ընկերությունը համաձայնել է իր գովազդը հեռացնել Լոնդոնի արևելյան շրջանում գտնվող Օլիմպիական ստադիոնից, որը գնահատվում էր յոթ միլիոն ֆունտ ստերլինգ:
Ինչպես հայտնում է Sky News-ը, այդ որոշումը կայացվել է, քանի որ Հնդկաստանի Օլիմպիական ասոցիացիան ավելի վաղ պահանջել էր ամբողջությամբ արգելել Dow Chemical-ի գովազդը Օլիմպիադայի ժամանակ:
Հնդկաստանը Dow Chemical-ի հետ վեճի մեջ է Բհոպալի աղետից հետո, երբ 1984 թվականին տեղի քիմիական գործարանում տեղի էր ունեցել պայթյուն, որի հետևանքով մահացել էին հազարավոր հնդիկներ: Նախապես գործարանը պատկանում էր ամերիկյան Union Carbide ընկերությանը, սակայն պայթյունից մոտ 10 տարի անց ընկերությունն անցել է Dow Chemical-ի վերահսկողության տակ:
Ամերիկացիները 470 միլիոն դոլար փոխհատուցում են վճարել տուժածների ընտանիքներին, սակայն Հնդկաստանում համարում են, որ դա բավարար չէ: Դրա հետ կապված՝ Հնդկաստանի Օլիմպիական ասոցիացիան դեկտեմբերի կեսերին դիմել է Օլիմպիադա-2012 կազմակերպիչներին` խնդրելով Dow Chemical անունը հեռացնել հովանավորների ցոցակից:
Ամերիկյան ընկերությունն իր հերթին ընդգծել է, որ հովանավորության պայմանագիրը նախատեսում էր հինգ վահանակների վրա բրենդավորում, որոնք պետք է հանվեին Օլիմպիական խաղերի սկսվելուց մի քանի ամիս առաջ:
