«Քաղաքացիական և միջազգային հետազոտությունների» կենտրոնը և ԱՄՆ ազգային ժողովրդավարական ինստիտուտը (NDI) այսօր «Կոնգրես» հյուրանոցում կազմակերպել էին քննարկում` «2012 թ. քաղաքական զարգացումների սպասումները» թեմայով:
Ըստ իշխանությունների` իրենք ունեն ընտրությունները արդար անցկացնելու քաղաքական կամք, և ամեն ինչ պետք է անեն, որպեսզի հետընտրական շրջանում հանրահավաքներ, բողոքի ակցիաներ տեղի չունենան:
«Ժողովրդավարական Հայրենիք» կուսակցության նախագահ Պետրոս Մակեյանը նշեց, որ 2012 թ. կանխատեսումներն անելիս պետք է, այնուամենայնիվ, դիտարկել վերջին երկու տարիները, մասնավորապես 2011 թվականը:
«Գարնանային ակտիվությունը չկարողացանք օգտագործել, և Հայ ազգային կոնգրեսը գնաց երկխոսության` երկիրը ցնցումներից զերծ պահելու նպատակով, մինչդեռ տարբեր երկրներում թափ էր առել «արաբական գարունը»:
Պետրոս Մակեյանի կարծիքով` արդյունքում այժմ ունենք վստահությունը կորցրած հասարակություն, որը չի հավատում որևէ փոփոխության:
Կոնգրեսի մաս կազմող կուսակցության առաջնորդը նշեց, որ իշխող կոալիցիան փաստացի գոյություն չունի, քանի որ բոլոր սուբյեկտները փորձել են մաքրվել Մարտի 1-ից` պատասխանատվությունը թողնելով Ռոբերտ Քոչարյանի վրա. ՀՅԴ-ն դուրս է եկել կոալիցիայից, ՕԵԿ-ը քաղաքական դիակ է:
Պ. Մակեյանը նշեց, որ իշխանությունները ցանկություն ունեն գնալ կեղծիքների, բայց դա անել մեկ տարվա ընթացքում երկու անգամ` անհնարին է. «2012 թ. կարելի է իշխանությանը պարտադրել օրինակելի ընտրություններ անցկացնել և երկրում վերականգնել սահմանադրական կարգը»,- հայտարարեց Պ. Մակեյանը: Նա նաև հավելեց, որ արտաքին աշխարհի կողմից իշխանությունները աջակցություն են ստանում, քանի որ նրանց համար այս իշխանությունը կառավարելի է:
ՀՀԿ պատգամավոր Գագիկ Մելիքյանը հակադարձեց` ընդդիմությունը միշտ չէ, որ ժողովրդավարական ձևերով է տանում ներքաղաքական գործընթացները:
ՀՀԿ-ական պատգամավորը նկատեց, որ այս տարի Հայաստանի հասցեին միջազգային հանրության կողմից հնչել են դրական հայտարարություններ` նրանք հաշվի են առել ժողովրդավարության ուղղությամբ կատարվելիք աշխատանքները: ՀՀԿ-ական գործիչը դրական համարեց Ֆրանսիայի եւ Լիբանանի նախագահների այցը Հայաստան: Նա նշեց` իհարկե, խնդիրներ կան, բայց դրանք սոցիալական ոլորտում են և պետք է աշխատանքները շարունակել:
Գագիկ Մելիքյանը կարևորեց կուսակցության` ԵԺԿ-ի հետ համագործակցությունը` արտաքին քաղաքականության բնագավառում դա համարելով դրական երևույթ:
ՀՀԿ-ական գործիչը շեշտեց, որ առաջիկա խորհրդարանական ընտրությունները նախորդի համեմատ լավագույնս կանցկացվեն:
Անդրադառնալով կոալիցիային` նշեց, որ այն գործում է հուշագրի շրջանակներում, և որևէ ուժ այդ հուշագրից առանձնանալու հայտարարություն չի արել և չի անելու:
«Այս տարի ընդդիմության հանրահավաքները միտում ունեին մարելու, հասարակությունը հասունացավ և գիտակցեց, որ հանրահավաքներով խնդիրները չեն լուծվելու, և արտաքին ու ներքին քաղաքական խնդիրները հաղթահարելու միակ երաշխիքը Ս. Սարգսյանի շուրջ համախմբումն է: