2011 թվականը կորսված տարի էր. ևս մեկ տարով հետաձգվեց անհրաժեշտ խնդիրների լուծումը: Այսօր լրագրողների հետ հանդիպմանը նման կարծիք հայտնեց ԱԺ «Ժառանգություն» խմբակցության անդամ Արմեն Մարտիրոսյանը` ամփոփելով քաղաքական տարին:
Նա նշեց, որ ևս մեկ տարով հետաձգվեց Հայաստանի խնդիրների անհրաժեշտ լուծումը, որը մնաց գալիք տարիների վրա: Բանախոսը ներկայացրեց այն կորուստները, որոնք արձանագրվել են այս տարի: Ըստ նրա` ընդունված Ընտրական օրենսգիրքը չհամապատասխանեց այն ցանկություններին, որն ուներ հասարակությունը: «Արդյունքում, եթե ԸՕ-ն այս տեսքով կյանքի կոչվի, ապա ԱԺ-ում չի ապահովվելու քաղաքական ուժերի ճիշտ ներկայացվածությունը»,- մեկնաբանեց քաղաքական գործիչը` ազատ և արդար ընտրությունների կազմակերպման հարցում կարևորելով Ընտրական օրենսգիրքը:
Ա. Մարտիրոսյանը ցավով նշեց, որ տնտեսության ոլորտում ևս ուրախանալու ոչինչ չկա: Ըստ նրա` այն ցուցանիշները, որոնք կան այսօր, լավատեսության տեղիք չեն տալիս:
«Կա գնաճ, վերջին տարվա ընթացքում ապրանքների գինը կրկնակի է ավելացել: Դրա արդյունքում է, որ աղքատությունը հասնում է 35%-ի, փորձագիտական արդյունքներով` 60%-ի»,- նշեց «Ժառանգություն» խմբակցության պատգամավորը` հավելելով, որ սա իր բացասական ազդեցությունը կթողնի: Նա նաև բացասական փաստ համարեց այն, որ գործարարներն իրենց կապիտալը փորձում են դուրս հանել, քաղաքացիների անվստահությունը չափազանց մեծ է: Նրա համոզմամբ` սա հենց արտագաղթի հիմքն է:
