ՀՀ մարդու իրավունքների գրասենյակի տարեկան զեկույցների ուսումնասիրությունից պարզ է դառնում, որ այս մարմին ներկայացրած դիմում-բողոքների թիվը տարեցտարի նվազում է: Պատճառն, ըստ ՄԻՊ մամլո խոսնակ Ծովինար Խաչատրյանի, այն է, որ քաղաքացիների իրավագիտակցությունը բարձրացել է, եւ եթե նախկինում ՄԻՊ գրասենյակը ստանում էր այնպիսի նամակներ, որոնց հասցեատերերը այլ պետական մարմիններ էին, ապա այժմ ստանում են միայն այն նամակները, որոնց իրական հասցեատերը գրասենյակն է: Հելսինկյան քաղաքացիական ասամբլեայի Վանաձորի գրասենյակի ղեկավար, իրավապաշտպան Արթուր Սաքունցը զարմացավ, թե իրավագիտակցության բարձրացումն ինչ կապ ունի բողոքների թվի նվազման հետ. «Ես այդ պատճառաբանության հետ համաձայն չեմ, շատ պարզ պատճառով. եթե իրավագիտակցությունը աճել է, չգիտեմ ինչով են չափել, այնուամենայնիվ, պետական մարմինները, որոնց հետ քաղաքացիները գործ ունեն, նրանց իրավագիտակցությունը հաստատ չի բարձրացել, եւ նրանք չեն սկսել ավելի գրագետ աշխատել, հետեւաբար այդ մարմինների կողմից քաղաքացիների խնդիրներին իրավական ճիշտ լուծումներ չեն տրվում»: Սաքունցի կարծիքով, դիմում-բողոքների նվազման իրական պատճառն այն է, որ պաշտպանի գրասենյակի նկատմամբ քաղաքացիների վստահությունն է նվազել. «Նվազման պատճառը, ցավոք սրտի, այն է, որ քաղաքացիները իրավական փակուղու մեջ են հայտնվում, երբ հարցը պետական մարմիններում չի լուծվում, եւ փորձում են գտնել այլ ճանապարհներ` շատ լավ հասկանալով, որ պաշտպանին դիմելու դեպքում էլ չի լուծվելու»:
