Այսօր Հռոմում հանդիպել են ԱՄՆ–ի և մի քանի այլ պետությունների ներկայացուցիչներ՝ քննարկելու համար Իրանի միջուկային ծրագրի պատճառով երկրի նկատմամբ սահմանված պատժամիջոցները։ Նրանք որոշել են մեծացնել Իրանի վրա ճնշումը` բանակցությունները սկսելու նպատակով:
Փակ դռենրի հետևում կայացած հանդիպմանը մասնակցել են, ըստ երևույթին, այն երկրների քաղաքական պաշտոնյաները, որոնք «նույն կերպ են մտածում»: «Նրանց մեջ են մտնում ԱՄՆ-ը, ԵՄ երկրները, Կանադան, Ավստարալիան, Ճապոնիան Հարավային Կորեան և հավանաբար Մերձավոր Արևելքի երկրներից որոշները»,– հայտնել է դիվանագետներից մեկը: Ըստ Associated Press-ի՝ մասնակից երկրների վերաբերյալ ստույգ տեղեկություններ չկան:
The Wall Street Journal-ը ներկայացրել է ամերիկացի, եվրոպացի և արաբ դիվանագետների հայտնած տեղեկատվությունը, ըստ որի, հանդիպման ժամանակ հիմնականում քննարկվել է Իրանում նավթի արտադրությունը և նավթի գների բարձրացումը:
Պաշտոնյաները, ըստ աղբյուրների, կարևորել են այն փաստը, որ Իրանը պետք է անհապաղ աշխարհին հստակ տեղեկություններ տա իր միջուկային ծրագրի վերաբերյալ: Նրանք նաև կարևորել են Թեհրանի հետ բանակցություններում միմյանց հետ համագործակցությունը:
Ինչպես բազմիցս հաղորդվել է, Իրանը հերքում է միջուկային զենք ստեղծելու իր մտադրության մասին լուրերը և հայտնում է, որ իր միջուկային ծրագիրը միայն խաղաղ նպատակներ ունի:
