Երևանի քաղաքապետ Տարոն Մարգարյանը հանդիպել է Երևանի քաղաքապետարանի ենթակայության հիմնական դպրոցների 2 տասնյակ տնօրենների հետ, ովքեր վերջերս են մրցութային կարգով ստանձնել տնօրենի պաշտոնը:
Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին տեղեկացնում են, որ քաղաքապետը ներկայացրել է կրթության ոլորտում քաղաքապետարանի դիրքորոշումն ու սկզբունքները:
«Ձեզ է վստահված վաղվա քաղաքացու կրթությունն ու դաստիարակությունը. սրտացավությամբ և պատվով պետք է կատարեք այդ առաքելությունը՝ վերականգնելով այն վստահությունը, որ միշտ եղել է դպրոցի և ուսուցչի նկատմամբ»,- նկատել է Տ. Մարգարյանը:
Անդրադառնալով դրամահավաքության երևույթներին՝ քաղաքապետը պահանջել է անել հնարավորը դրանք դպրոցում բացառելու համար և կարևորել է միասնականությամբ ու փոխվստահության մթնոլորտում կատարված աշխատանքը:
Տ. Մարգարյանը ընդգծել է, որ դպրոցներում պահանջվող հավելյալ ծախսերը կարելի է կատարել տնտեսումների հաշվին և «Օգնի՛ր դպրոցիդ» արշավից ստացված ֆինանսական միջոցների շնորհիվ, որոնց վերաբերյալ տնօրենները ներկայացնում են հաշվետվություններ:
Տնօրենները վստահեցրել են, որ արժանապատվորեն կկատարեն իրենց պարտականությունները:
Որպես մանկավարժների նկատմամբ քաղաքապետի ուշադրության դրսևորում՝ տնօրենները նշել են վաստակաշատ մանկավարժ, համար 140 դպրոցի նախկին տնօրեն Գարեգին Թադևոսյանին Քաղաքապետի պատվոգրի արժանացնելու՝ Տարոն Մարգարյանի որոշումը:
