Եգիպտոսի ոստիկանությունը սկսել է Կահիրեի Թահրիր հրապարակում հավաքված ցուցարարների նկատմամբ օգտագործել հրաձգային զենք, մահակներ և արցունքաբեր գազ:
«Իրավապահ մարմինների հարյուրավոր աշխատակիցներ և զինվորներ դուրս են եկել հրապարակ և սկսել կրակել: Նրանք հետապնդել են ցուցարարներին և ոչնչացրել իրենց ճանապարհին հայտնված ամեն ինչ, այդ թվում՝ դեղորայքն ու ծածկոցները»,- Reuters գործակալությանը պատմել է ականատեսներից մեկը:
Գործակալության աղբյուրի համաձայն՝ հրապարակում սկսված անկարգությունների սկզբից (ուրբաթ) զոհվել է 13, վիրավորվել՝ ավելի քան 500 մարդ:
Ցուցարարները Բարձրագույն զինվորական խորհրդից պահանջում են անմիջապես հրաժարվել իշխանությունից: Եգիպտոսի վարչապետ Քամալ Ալ-Գանզուրին ցուցարարներին անվանել է «հակահեղափոխականներ»:
