«ՀԱԿ-ին այսօր պետք է օր առաջ հստակեցնել ԲՀԿ-ի դիրքորոշումը։ Եթե այսօր ԲՀԿ-ն որոշում է միայնակ գնալ ընտրությունների, ապա կընկնի ՀՀԿ-ի իշխանության հալածանքի տակ։ Եվ դա այսօրվանից արդեն մենք զգում ենք։ Թող ընկնի։ Եվ դա կարող է թուլացնել կամ չթուլացնել ԲՀԿ-ին։ Այսինքն՝ պետք է սկսվի ՀՀԿ-ԲՀԿ կռիվը։ Թող օր առաջ սկսվի»,– մեկնաբանելով ՀԱԿ-ի վերջին հանրահավաքում ԲՀԿ-ի հետ կապված ՀԱԿ առաջնորդ Լևոն Տեր-Պետրոսյանի «քաղաքագիտական վերլուծությունը», «168 ժամ»–ին ասել է ՀՀ նախկին վարչապետ Հրանտ Բագրատյանը։
Ըստ նրա, ՀԱԿ-ն այդպիսով ԲՀԿ-ին դրդեց խորհրդարանական ընտրություններին մասնակցել որպես առանձին քաղաքական ուժ։
«Վստահ չեմ, բայց կարծում եմ, որ մայիսի 6-ի ընտրություններից հետո ամենահնարավոր սցենարն այն է, որ ԲՀԿ-ն գալու է Ազատության հրապարակ՝ արդար ընտրությունների խռովությանը, ընտրակեղծիքների դեմ պայքարելու գործընթացին միանալու։ Ես այդպես եմ կարծում, այլ ճար նրան չեն թողնելու»։
«Նրա մեկնաբանությունից կարելի է եզրակացնել, որ ՀԱԿ-ին անգամ չի մտահոգում հանգամանքը, որ ԲՀԿ-ն քաղաքական դաշտում, ըստ էության, հանդես է գալիս՝ որպես Ռոբերտ Քոչարյանի հենարան։ «Այնպես է ստացվել, որ այդ ուժերի գլխին կանգնած են հանրապետության նախկին և ներկա նախագահները։ Այնուամենայնիվ, ԲՀԿ-ի դեպքում որևէ ժխտում, որ իրենց հետևը կանգնած է Ռոբերտ Քոչարյանը, չի եղել։ Եթե անգամ ենթադրենք, որ ԲՀԿ-ն համեմատաբար ինքնուրույնություն ունի, իսկ մեր տեղեկությամբ՝ դա այդպես չէ, այնուամենայնիվ, այդ երեք հիմնական ուժերն են»,– ասել Է Հ. Բագրատյանը՝ շեշտելով, որ «ՀԱԿ-ն առաջինը կլինի, որ կուզենա՝ ԲՀԿ-ն շատ ձայն հավաքի»։
