ՀՀ ԱԺ փոխնախագահ Էդուարդ Շարմազանովը այսօր ամփոփիչ ասուլիսում անդրադառնալով նախընտրական տարում հնարավոր ցնցումներին` նշեց. «Եթե ոմանց պետք են ցնցումներ` մեզ բոլորիս պետք է ուժեղ Հայաստան»:
Իսկ որքանո՞վ անսասան լինի կոալիցիոն հուշագիրը գալիք տարում հարցին` Շարմազանովը պատասխանեց. «2011-ը արդյունավետ տարի էր կոալիցիայի համար, դա է վկայում փետրվարյան փաստաթուղթը, որով կոալիցիոն ուժերը պետք է նախագահի միասնական թեկնածուի պաշտպանեն: Կարևորն այն է, որ երեք կոալիցիոն ուժերը համախմբված են Սերժ Սարգսյանի շուրջ»,- հայտարարեց Շարմազանովը:
ՀՀԿ-ԲՀԿ միասնական ցուցակի հետ կապված լուրերին անդրադառնալով` նա ասաց. «ՀՀԿ-ն չի քննարկել ապագա ընտրությունների ոչ ռազմավարական, ոչ մարտավարական հարցերը»` հավելելով, որ փետրվար-մարտին կլինի ՀՀԿ համագումար, որի ընթացքում են կորոշվի նախընտրական ցուցակը:
Եվրասիական միության հետ կապված` ՀՀԿ փոխնախագահը նշեց, որ ՀՀԿ-ն թեև դրական է համարում ինտեգրացիոն քաղաքականությունը բոլոր երկրների հետ, բայց այնուամենայնիվ այդ միության շրջանակներում մաքսային որևէ հարաբերության մասին խոսելը դեռևս վաղ է, քանի որ ՌԴ-ի հետ Հայաստանը սահման չունի:
«Մենք իրականացնում ենք պրոհայկական քաղաքականություն»,- հայտարարեց Շարմազանովը:
Ըստ նրա` անցնող տարվա ամենամեծ թերությունն այն է, որ մեր երկրում դեռեւս կան աղքատներ, մեր երկրում դեռևս կա կոռուպցիա: Ինչ վերաբերում է ձեռքբերումներին, նա նշեց, որ բարեփոխումների արդյունքում ավելի են նվազեցվել կոռուպցիայի հնարավորությունները, իսկ ներկա Ընտրական օրենսգիրքը ամենաժողովրդավարականն է ԱՊՀ տարածքում:
Ամենաազդեցիկ ուժը առաջիկա տարում նորից կլինի ՀՀԿ-ն, նշեց էդուարդ Շարմազանովը` անթույլատրելի համարելով ՌԴ-ում «Եդինայա Ռոսիա»-ի առավել նվազ վստահության փաստը համեմատել Հայաստանի իշխող կուսակցության հետ: