Վլադիմիր Գասպարյանն աչքի ընկավ կադրային փոփոխություններով: «Առաջին լրատվական»-ի հետ զրույցում նման տեսակետ հայտնեց Վանաձորի Հելսինկյան քաղաքացիական ասամբլեայի նախագահ, իրավապաշտպան Արթուր Սաքունցը` ամփոփելով ՀՀ ոստիկանապետ Վլադիմիր Գասպարյանի մեկամսյա պաշտոնավարումը:
Իրավապաշտպանի համոզմամբ, ամենացայտունը կադրային փոփոխություններն էին: «Նկատել ենք անընդհատ տեղափոխություններ, որը բնորոշում է, թե ինչպես են պետական ապարատին վերաբերվում: Մեզ համար նաև հասկանալի չեն, թե ինչ սկզբունքներով են այդ կադրային փոփոխությունները կատարվում»,- նկատեց Ա. Սաքունցը:
Իրավապաշտպանը խոսեց ևս մեկ միտումից. աշխատանքներ են կատարվում, որպեսզի բացահայտվեն նախկինում կատարված հանցագործությունները, որոնք ապացույցների անբավարարության պատճառով կարճվել էին: Սա Ա. Սաքունցը որոշակի քայլ է համարում:
Անդրադառնալով ԲՀԿ անդամների ձերբակալություններին`նա մեկնաբանեց, որ դա կաներ և՛ Վլադիմիր Գասպարյանը, և՛ Ալիկ Սարգսյանը: «Դա այն հրահանգն էր, որը պետք է կատարվեր: Այսինքն` դա իր իրավասությունների շրջանակում չէր կարող տեղավորվել, քանի որ որևիցե քաղաքական ուժի, ներկայացուցչի նկատմամբ ոստիկանապետը քայլ չէր կատարի առանց համաձայնության կամ հրահանգի»,- նշեց Ա. Սաքունցը`Հայաստանում դա ընդունված կարգ համարելով: Նրա համոզմամբ` քաղաքական կուսակցությունների անդամների կողմից իրավախախտումների առկայության դեպքում ոստիկանության գործողությունները կարող են կատարվել միայն քաղաքական պատվերի շրջանակում: «Ոստիկանապետերից դա կախված չէ»,- ընդգծեց Ա. Սաքունցը:
Հիշեցնենք, որ նոյեմբերի 1-ին Սերժ Սարգսյանի հրամանագրով Ալիկ Սարգսյանն ազատվել էր ՀՀ կառավարությանն առնթեր ՀՀ ոստիկանապետի պաշտոնից և նշանակվել ՀՀ նախագահի խորհրդական: Այլ հրամանագրով գեներալ-լեյտենանտ Վլադիմիր Գասպարյանը ազատվել էր ՀՀ պաշտպանության նախարարի տեղակալի պաշտոնից և նշանակվել ՀՀ ոստիկանապետ:
