«Բաբաջանյան Ֆեստի» ընթացքում ունեցել ենք 5 փայլուն համերգ` դրսի մենակատարներով, շատ բարդ ծրագրերով: Թեև փառատոնը կազմակերպվում է 3-րդ անգամ, սակայն զգում ենք, որ ավելի լայն զանգված է սկսում հետաքրքրվել հայ ժամանակակից երաժշտությամբ: Լրագրողների հետ հանդիպմանն ուրախությամբ ասաց Հայաստանի պետական երիտասարդական նվագախմբի գեղարվեստական ղեկավար ու դիրիժոր Սերգեյ Սմբատյանը:
Նա տեղեկացրեց, որ փառատոնի փակման գալա համերգին Հայաստանի պետական երիտասարդական նվագախումբը հանդես կգա հայ աստղերի հետ, որոնք կկատարեն Բաբաջանյանի էստրադային շլյագերները:
«Այս տիպի նախագիծ առաջին անգամ ենք իրականացնում, և ես զգում եմ, որ առկա է շատ մեծ հետաքրքրություն, քանի որ շատերը չեն հասկանում սիմֆոնիկ նվագախմբի ու էստրադային աստղերի կապը»,- կատակով ասաց դիրիժորը` նշելով, որ դա իրենց կողմից բավական «համարձակ քայլ է»:
Նա ընդգծեց, որ կոմպոզիտորների գործերը կներկայացվեն նորովի:
Ասուլիսին ներկա երգիչ Հայկոն էլ իր հերթին նշեց, որ ուրախ է սիմֆոնիկ նվագախմբի հետ ելույթի համար: Նրա խոսքով` եթե առաջ խնդիր կար փրկել ազգային երգն ու դասական երաժշտությունը, ապա հիմա արդեն խնդիր կա փրկել էստրադային երաժշտությունը:
«Այսօր էստրադային երաժշտության մեջ էլ ամեն ինչ խառնվել է, ու մարդիկ արդեն չեն հասկանում` ով է ռաբիս ստեղծագործողը, և ով` էստրադային ժանրում ստեղծագործողը»,- նկատեց նա` հավելելով, որ նման նախագծերով իրենք կփրկեն էստրադային երաժշտությունը:
Նա, բացելով փակագծերը, տեղեկացրեց, որ իր կյանքի ամենամեծ երազանքը հաջորդ տարի Հայաստանի պետական երիտասարդական նվագախմբի հետ ձայնագրվելն է:
«Արդեն ոչ միայն պայմանավորվածություն կա, այլև գրվում են նոտաները»,- հավելեց երգիչը:
Համերգին հանդես կգան էստրադային հայտնի երգիչ-երգչուհիներ` Սիրուշոն, Էմմին, Հայկոն, Անդրեն, Սոֆի Մխեյանը, Անահիտ Սիմոնյանը, Մհերը, Էրիկը, Մարատ Հայրապետյանը և օպերային մեներգիչ Գևորգ Հակոբյանը:
Վերջիններս կկատարեն Ա. Բաբաջանյանի հայտնի ու սիրված երգերը:
Փառատոնն անցկացվում է մշակույթի նախարարության աջակցությամբ, կազմակերպիչներն են Հայաստանի կոմպոզիտորների ու երաժշտագետների միությունն ու Հայաստանի պետական երիտասարդական նվագախումբը:
