«Փաստարկ» մամուլի ակումբի այսօրվա հյուրն էր ՌԴ Աշխարհաքաղաքական հիմնախնդիրների ակադեմիայի նախագահի տեղակալ, ՌԴ նախագահի թեկնածու Լեոնիդ Իվաշովի ներկայացուցիչ Արայիկ Սարգսյանը:
«Մեր թեկնածուն ունի երկրորդ փուլ անցնելու իրավունք, որովհետև վերջին ընտրությունները ցույց տվեցին, թե որքան կեղծիքներ են տեղի ունեցել հօգուտ «Եդինայա Ռոսիա»-ի»,- նշեց Արայիկ Սարգսյանը:
Եթե արդար ընտրություններ չլինեն, ՌԴ-ում ծանր իրավիճակ կստեղծվի, նկատում է Արայիկ Սարգսյանը` հավելելով. եթե ռուս «մուժիկը» կացին վերցնի, իշխանությունների համար շատ ծանր վիճակ կստեղծվի:
Ռուս «մուժիկը» այն հարբեցողը չէ, որին մշտապես ներկայացնում են, ասաց ՌԴ նախագահի թեկնածու Լեոնիդ Իվաշովի ներկայացուցիչ Արայիկ Սարգսյանը, որը Հայաստանի Հանրապետության քաղաքացի է:
«Հպարտ եմ, որ իմ ընկերն է առաջադրվելու, պատկերացնում եմ, եթե իմ փոխարեն լիներ մի ադրբեջանցի, ապա այլ արձագանք կլիներ»,- նշեց նա:
Նա հավելեց նաև, որ միանում է Ազնավուրի բոլոր հայտարարություններին. «Ես հասկանում եմ, թե ինչու են ՀՀ իշխանությունները այսպես սառը ընդունում մեր կողմից ՌԴ նախագահական ընտրություններում այլ թեկնածու պաշտպանելու փաստը և ինչու չեն ողջունում»:
Ըստ նրա` ՌԴ-ից հանվում է հիմնական կապիտալը, քանի որ այնտեղ շատ լավ հասկանում են` ընտրություններից հետո հիմնական թիրախը կդառնան ձեռներեցները. «ՌԴ-ում պե՛տք է մի անգամ արդար ընտրություններ անցկացվեն»:
