Վարչապետ Տիգրան Սարգսյանն այսօր ընդունել է ուկրաինական «Դոնհարդ Հոլդինգ» ներդրումային ընկերության համահիմնադիր, «Սթոր ֆուդ» ընկերության տնօրենների խորհրդի նախագահ Սերգեյ Կալենիչիին:
Հանդիպման ընթացքում Սերգեյ Կալենիչին կառավարության ղեկավարին է ներկայացրել երկու տարի առաջ սննդի արդյունաբերության ոլորտում մեկնարկած ներդրումային ծրագրի իրականացման արդյունքները: Նա նշել է, որ մասնավորապես, սպիրտային ըմպելիքների և գյուղատնտեսական արտադրանքի վերամշակման ոլորտում գործունեություն ծավալող «Հայասի Գրուպ» ընկերությունում կատարվել են շուրջ 25 մլն դոլարին համարժեք ներդրումներ: Արդյունքում ըմպելիքների և պահածոյացված բանջարեղենի ու մրգերի շուկայում գործող այս ընկերությունում ստեղծվել է շուրջ 700 աշխատատեղ: Սերգեյ Կալենիչին տեղեկացրել է, որ նախատեսվում է նաև ընկերությունում մենեջմենթի և մարկետինգային կառավարման ժամանակակից միջազգային չափանիշների ներդրում: Ընդգծելով, որ մինչև տարեվերջ «Հայասի Գրուպ» ընկերության արտադրանքը կներկայացվի հայկական շուկայում, պարոն Կալենիչին հավաստիացրել է, որ կարվի ամեն ինչ հայկական արտադրանքի արտահանման համար լայն շուկա ապահովելու ուղղությամբ:
Վարչապետը գոհունակություն է հայտնել ծրագրի իրականացման արդյունքներից և ընդգծել, որ ՀՀ կառավարությունը մեծապես կարևորում է նմանօրինակ ներդրումային ծրագրերի իրականացումը, որոնք կնպաստեն մեր երկրի արտահանման ներուժի և հնարավորությունների մեծացմանը:
Հանդիպման ավարտին Սերգեյ Կալենիչին պատասխանել է լրատվամիջոցների հարցերին:
